പൊന്നിയൻ സെൽവൻ 2-ന്റെ ട്രെയിലർ ലോഞ്ച് മാർച്ച് 29-ന് ചെന്നൈ നെഹ്‌റു ഇൻഡോർ സ്‌റ്റേഡിയത്തിൽ നടക്കും. ആയിരക്കണക്കിന് ആരാധകരുടെ സാന്നിധ്യത്തിലായിരിക്കും ചടങ്ങ് നടക്കുക. കൂടാതെ ഇന്ത്യൻ സിനിമയിലെ പ്രധാന താരങ്ങളും ചടങ്ങിൽ സന്നിഹിതരായിരിക്കുമെന്നും റിപ്പോർട്ടുകൾ പുറത്ത് വരുന്നുണ്ട്. ട്രെയിലറിനൊപ്പം എ ആർ റഹ്‌മാൻ സംഗീതം പകർന്ന ഏഴ് ഗാനങ്ങൾ ഉൾപ്പെട്ട മ്യൂസിക് ആൽബവും പുറത്തിറക്കും.
റഫീക്ക് അഹമ്മദിന്റെ രചനയിലാണ് അഞ്ചു ഭാഷകളിൽ എത്തുന്ന പി എസ് -2വിലെ മലയാള ഗാനങ്ങൾ ഒരുങ്ങുന്നത്. എന്നാൽ ഇപ്പോഴിത മ്യൂസിക് ആൽബത്തിന്റെ മേക്കിംഗ് വീഡിയോ നിർമ്മാതാക്കളായ ലൈക്ക പ്രൊഡക്ഷൻസും മെഡ്രാസ് ടാക്കീസും പുറത്തുവിട്ടിരിക്കുകയാണ്. ശ്വേത മോഹൻ, ചിന്മയി, ശക്തിശ്രീ ഗോപാൽ എന്നിവരുടെ ഗാനാലാപനത്തിന്റെ മേക്കിംഗ് വീഡിയോ സമൂഹമാദ്ധ്യമങ്ങളിൽ വൈറലായിരിക്കുകയാണ്.
ബ്രഹ്‌മാണ്ഡ ചിത്രമായ പൊന്നിയൻ സെൽവൻ-2 തമിഴ്, മലയാളം, തെലുങ്ക്, കന്നഡ, ഹിന്ദി എന്നീ ഭാഷകളിലായി ഏപ്രിൽ 28-നാണ് പ്രദർശനത്തിനെത്തുക. ശ്രീ ഗോകുലം മൂവീസാണ് ചിത്രത്തിന്റെ കേരളത്തിലെ വിതരണക്കാർ. വിക്രം, കാർത്തി, ജയം രവി, ഐശ്വര്യ റായ്, തൃഷ, റഹ്‌മാൻ, പ്രഭു, ജയറാം, ശരത് കുമാർ, വിക്രം പ്രഭു, ബാബു ആന്റണി, പ്രകാശ് രാജ്, നാസർ, റിയാസ് ഖാൻ, ലാൽ, ഐശ്വര്യ ലക്ഷ്മി, ജയചിത്ര എന്നിങ്ങനെ വലിയൊരു താരനിരയാണ് ചിത്രത്തിലുള്ളത്.
