കൊച്ചി: നെടുമ്പാശേരി അന്താരാഷ്ട്ര വിമാനത്താവളത്തിൽ വീണ്ടും സ്വർണവേട്ട. ദുബായിയിൽ നിന്നെത്തിയ മലപ്പുറം സ്വദേശി സൈഫുള്ളയിൽ നിന്നും അനധികൃതമായി കടത്താൻ ശ്രമിച്ച 52.5 ലക്ഷം രൂപവിലമതിക്കുന്ന 1139 ഗ്രാം സ്വർണം പിടികൂടി. തുടയിൽ ഒളിപ്പിച്ചനിലയിലായിരുന്നു സ്വർണം. എയർ കസ്റ്റംസാണ് സ്വർണം പിടികൂടിയത്.
അടുത്തിടെ സമാനരീതിയിൽ രണ്ട് സംഭവങ്ങൾ കൊച്ചി വിമാനത്താവളത്തിൽ നടന്നിരുന്നു. മലപ്പുറം സ്വദേശിയായ അബ്ദുൾ സലീമിൽ നിന്ന് 873.98 ഗ്രാം സ്വർണമാണ് പിടിച്ചെടുത്തത്. കസ്റ്റംസും എയർ ഇന്റലിജൻസും ചേർന്നാണ് അനധികൃതമായി കടത്താൻ ശ്രമിച്ച സ്വർണം പിടികൂടിയത്. ശരീരത്തിൽ ഗുളികളായി ഒളിപ്പിച്ച നിലയിലായിരുന്നു സ്വർണം. മറ്റൊരു യാത്രക്കാരനിൽ നിന്ന് 1158.55 ഗ്രാം സ്വർണവും പിടികൂടിയിരുന്നു.
