വേനൽക്കാലമായാൽ പിന്നെ ദാഹവും ചൂടുമാണ്. ഒപ്പം നിർജലീകരണം പോലുള്ളവയും വരാനുള്ള സാധ്യതകളേറെയാണ്. അതുകൊണ്ട് തന്നെ കൊടും വേനലിനെ പ്രതിരോധിക്കാനുള്ള മികച്ച മാർഗം തണുത്ത വെള്ളവും പാനീയങ്ങളും കുടിക്കുകയെന്നത് തന്നെയാണ്. അതുപോലെ തന്നെ വെള്ളത്തിന്റെ അളവ് കൂടുതലുള്ള പഴങ്ങളും നല്ലതാണ്. തണ്ണിമത്തൻ ഒരു ഉദാഹഹരണം. വിശപ്പും ദാഹവും ഒരു പോലെ ശമിപ്പിക്കാൻ കഴിവുള്ള ഒന്നാണിത്.
പൊതുവേ കുരു കളഞ്ഞാണ് തണ്ണിമത്തൻ കഴിക്കുന്നത്. എന്നാൽ തണ്ണിമത്തന്റെ കുരു കളയാതെ കഴിക്കണമെന്നാണ് പറയുന്നത്. കാരണമെന്തെന്നോ? പോഷക സമൃദ്ധമാണ് തണ്ണിമത്തൻ കുരു. അതുകൊണ്ടാണ് അവ ഉണക്കി വാങ്ങാൻ കഴിയുന്നത്. ചർമാരോഗ്യത്തിനും മുഖസൗന്ദര്യത്തിനും തണ്ണിമത്തൻ കുരു ബെസ്റ്റാണ്. വാർദ്ധക്യത്തിന് കാരണമാകുന്ന ഫ്രീ റാഡിക്കലുകളിൽ നിന്നുള്ള ഓക്സിഡേറ്റീവ് നാശത്തെ തടയുന്നതിലൂടെ ചർമ്മത്തെ സംരക്ഷിക്കുന്ന ആന്റിഓക്സിഡന്റുകൾ തണ്ണിമത്തൻ വിത്തുകളിൽ അടങ്ങിയിട്ടുണ്ട്. ഇതിലെ എ, ബി, സി എന്നീ വൈറ്റമിനുകൾ ചർമത്തിന് നല്ലതാണ്. കൊളാജൻ ഉൽപാദനത്തിന് ഇത് സഹായിക്കുന്നു. ചർമത്തിന് തിളക്കം നൽകാനും പാടുകളും കുത്തുകളുമെല്ലാം മങ്ങിപ്പോകാനും ഇത് സഹായിക്കുന്നു.
ഹൃദയത്തെ കാത്തുപരിപാലിക്കുന്നതിനും തണ്ണിമത്തൻ കുരു വഹിക്കുന്ന പങ്ക് ചെറുതല്ല. അവയിൽ അടങ്ങിയിരിക്കുന്ന മഗ്നീഷ്യം ഉയർന്ന രക്തസമ്മർദ്ദം കുറയ്ക്കുന്നതിനും ആന്റിഹൈപ്പർടെൻസിവ് മരുന്നുകൾ കൂടുതൽ ഫലപ്രദമാക്കുന്നതിനും സഹായിക്കുന്നു.തണ്ണിമത്തൻ വിത്തുകളിൽ മോണോസാച്ചുറേറ്റഡ്, പോളിഅൺസാച്ചുറേറ്റഡ് ഫാറ്റി ആസിഡുകൾ അടങ്ങിയിട്ടുണ്ട്. ഇത് രക്തത്തിലെ എൽഡിഎൽ കൊളസ്ട്രോൾ അല്ലെങ്കിൽ മോശം കൊളസ്ട്രോൾ കുറയ്ക്കുന്നു.
ശരീരത്തിന്റെ പ്രതിരോധശേഷി മെച്ചപ്പെടുത്താനും തണ്ണിമത്തൻ കുരുവിനാകും. ഗ്ലോബുലിൻ, ആൽബുമിൻ എന്നീ പ്രോട്ടീനുകൾ അടങ്ങിയിട്ടുണ്ട്, ഈ വിത്തുകളിൽ മഗ്നീഷ്യം, ഇരുമ്പ്, സിങ്ക് തുടങ്ങിയ ധാതുക്കളും അടങ്ങിയിട്ടുണ്ട്. ഇത് രോഗപ്രതിരോധ ശേഷിയെ മെച്ചപ്പെടുത്തുവാൻ സഹായിക്കുന്നു, അണുബാധകൾക്കെതിരെ പോരാടാനും രക്തപ്രവാഹത്തിലെ ദ്രാവകത്തിന്റെ അളവ് നിലനിർത്താനും അത് സഹായിക്കുന്നു. വിറ്റാമിൻ സി, ബി കോംപ്ലക്സ്, അമിനോ ആസിഡുകൾ എന്നിവയും ഇതിൽ അടങ്ങിയിട്ടുണ്ട്. സെലേനിയം സമ്പുഷ്ടമാണ് തണ്ണിമത്തൻ. ഇതും പ്രതിരോധശേഷി മെച്ചപ്പെടുത്തുന്ന ഒന്നാണ്.
