ന്യൂഡൽഹി: ആരാധകർക്ക് ആവേശമായി ഋഷഭ് പന്തിന്റെ പുതിയ വീഡിയോ എത്തി. ഐപിഎല്ലിന്റെ പതിനാറാം സീസണിന്റെ ആവേശ പൂരത്തിന് തിരിതെളിയാൻ മണിക്കൂറുകൾ മാത്രം ആവശേഷിക്കേയാണ് താരത്തിന്റെ പുതിയ വീഡിയോ. അപകട ശേഷം വിശ്രമത്തിൽ തുടരുന്ന താരം നേരത്തേ തന്നെ ഈ സീസൺ കളിക്കുന്നില്ല എന്ന വാർത്തകൾ പുറത്തു വന്നിരുന്നു. ആരാധകർക്ക് ആവേശമായി ഇപ്പോൾ പുറത്തുവന്നിരിക്കുന്ന താരത്തിന്റെ വീഡിയോ സാമൂഹ്യമാധ്യമങ്ങളിൽ വൈറലാവുകയാണ്.
ഞാനും കളിക്കാൻ വരുന്നു എന്നതാണ് വീഡിയോയുടെ ഉള്ളടക്കത്തിൽ പറയുന്നത്. ക്രിക്കറ്റും ഭക്ഷണവും ഒഴിവാക്കി തനിക്ക് ജീവിക്കാൻ സാധിക്കില്ല. എന്നാൽ കൃത്യമായി ഭക്ഷണം കഴിക്കണമെന്ന് ഡോക്ടർ പറഞ്ഞിട്ടുണ്ട്. അതിനാൽ ആരോഗ്യകരമായ ഭക്ഷണം വീട്ടിൽ തന്നെയുണ്ട്. ക്രിക്കറ്റ് സീസൺ ആരംഭിക്കാൻ പോകുന്നു. എല്ലാവരും കളിക്കുന്നുണ്ടെങ്കിൽ എന്തുകൊണ്ട് ഞാൻമാത്രമില്ല. ഞാൻ ഇപ്പോഴും ബോസാണ്. ഞാനും കളിക്കാൻ വരുന്നു. എന്നാണ് സോമാറ്റോയുടെ പുതിയ പരസ്യത്തിലെ ഋഷഭ് പന്തിന്റെ വാക്കുകൾ.
ശനിയാഴ്ച ലഖ്നൗ സൂപ്പർ ജയന്റ്‌സിന് എതിരെയാണ് ഡൽഹി ക്യാപിറ്റൽസിന്റെ ആദ്യ ഐപിഎൽ മത്സരം. മത്സരം ഒറ്റയ്‌ക്ക് മാറ്റിമറിക്കാൻ കഴിയുള്ള വിക്കറ്റ് കീപ്പറും ബാറ്ററുമായ റിഷഭ് പന്തിന്റെ അഭാവം നികത്തുക എന്നത് ഡൽഹിയ്‌ക്ക് പ്രയാസമാകും.
2022 ഡിസംബർ 30നുണ്ടായ കാറപകടത്തിലാണ് റിഷഭ് പന്തിന്റെ വലത്തേ കാലിന് ഗുരുതരമായി പരിക്കേറ്റത്. അമ്മയെ കാണാനായി ഡൽഹിയിൽ നിന്ന് റൂർക്കിയിലേക്കുള്ള യാത്രയ്‌ക്കിടെയായിരുന്നു അപകടം. റിഷഭ് സഞ്ചരിച്ച കാർ ഇടിച്ച ശേഷം തീപ്പിടിക്കുകയായിരുന്നു. ശസ്ത്രക്രിയക്ക് ശേഷം വീട്ടിൽ ഫിസിയോതെറാപ്പി അടക്കമുള്ള തുടർ ചികിൽസകൾക്ക് വിധേയനാവുകയാണ് റിഷഭ് പന്ത് ഇപ്പോൾ. എന്നാൽ ഇടക്കിക്കിടെ ആരാധകർക്കായി താരം തന്റെ പുതിയ ചിത്രങ്ങളും വീഡിയോകളും പങ്കിടാറുണ്ട്.
