മലയാളികളുടെ പ്രിയപ്പെട്ട നടനാണ് ജഗദീഷ്. കോമഡി റോളുകളിലൂടെ മലയാളികളെ ചിരിപ്പിച്ച താരം ഇന്ന് കൂടുതലും ചെയ്യുന്നത് മികച്ച ക്യാരക്ടർ വേഷങ്ങളാണ്. രഞ്ജിത്ത് സംവിധാനം ചെയ്ത ലീല മുതൽ അടുത്തിടെ പുറത്തിറങ്ങിയ റോഷാക്ക്, കാപ്പ തുടങ്ങിയ ചിത്രങ്ങളിലടക്കം ജഗദീഷ് ചെയ്തത് ശ്രദ്ധേയമായ ക്യാരക്ടർ വേഷങ്ങളാണ്. അടുത്തിടെയാണ് അദ്ദേഹത്തിന്റെ ഭാര്യ രമ മരണപ്പെട്ടത്. താൻ ക്യാരക്ടർ വേഷങ്ങൾ ചെയ്യണമെന്നത് തന്റെ ഭാര്യയുടെ ഏറ്റവും വലിയ അഗ്രഹമായിരുന്നു എന്ന് തുറന്നു പറയുകയാണ് നടൻ ജഗദീഷ്. തന്റെ കഴിവിൽ തന്നെക്കാൾ വിശ്വസിച്ചിരുന്നത് ഭാര്യ ആയിരുന്നുവെന്നും നടൻ പറഞ്ഞു.
‘ഞാൻ ക്യാരക്ടർ വേഷം കൂടുതൽ ചെയ്യണമെന്ന് ആഗ്രഹിച്ചിരുന്നയാളാണ് ഭാര്യ രമ. ഇപ്പോൾ അത്തരം കഥാപാത്രങ്ങൾ കൂടുതൽ വന്നപ്പോൾ കാണാൻ അവളില്ല. രാത്രി കിടക്കുമ്പോഴും രാവിലെ എഴുന്നേൽക്കുമ്പോഴും എല്ലാം രമ എന്റെ മനസിലേക്ക് കടന്ന് വരും. എന്റെ കഴിവിൽ എന്നെക്കാൾ വിശ്വസിച്ചിരുന്നത് അവളായിരുന്നു. നല്ല ക്യാരക്ടർ വേഷങ്ങൾ ഉറപ്പായും തേടി വരും എന്ന് അവൾക്ക് ഉറപ്പായിരുന്നു. സിനിമയുടെ പ്രശസ്തിയോ സിനിമാ നടന്റെ ഭാര്യയെന്ന പേരോ രമ ഒരിക്കലും ആഗ്രഹിച്ചില്ല’.
‘മക്കളുടെ കല്യാണത്തിന് അതിഥികൾ വരുമ്പോൾ ഞാൻ രാഷ്‌ട്രീയക്കാരെയും സിനിമാക്കാരെയും സ്വീകരിക്കാൻ നിൽക്കും. അപ്പോൾ, രമ അവളുടെ ജോലിയുമായി ബന്ധപ്പെട്ട സ്റ്റാഫിനെയും പഴയ കൂട്ടുകാരെയും സ്വീകരിക്കാനാണ് മുന്നിൽ നിന്നത്. തനിക്ക് പിടിപെട്ട രോഗാവസ്ഥയെ കുറിച്ച് ഡോക്ടറെന്ന നിലയിൽ രമയ്‌ക്ക് നല്ല ബോധ്യമുണ്ടായിരുന്നു. എന്നാൽ ഒരിക്കൽ മാത്രമേ രമയുടെ കണ്ണ് നിറഞ്ഞ് ഞാൻ കണ്ടിട്ടുള്ളു’- എന്ന് ജഗദീഷ് ഒരു അഭിമുഖത്തിൽ പറഞ്ഞു.
