സുരേഷ് ഗോപിയുടെ ഇളയ മകൻ മാധവ് സുരേഷ് നായകനാകുന്ന കുമ്മാട്ടിക്കളിയുടെ ഫസ്റ്റ് ലുക്ക് പോസ്റ്റർ റിലീസ് ചെയ്തു. മാധവ് സുരേഷ് നായകനായി എത്തുന്ന ആദ്യ ചിത്രമാണ് ആർ.കെ വിൻസെന്റ് സെൽവ സംവിധാനം ചെയ്യുന്ന കുമ്മാട്ടിക്കളി. പ്രഖ്യാപനം മുതൽക്കെ ശ്രദ്ധ നേടിയ ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടത് നടൻ സുരേഷ് ഗോപി തന്നെയാണ്. പ്രണയത്തിന്റെയും സൗഹൃദത്തിന്റെയും പ്രതികാരത്തിന്റെയും കഥ പറയുന്ന ചിത്രം നിർമ്മിക്കുന്നത് സൂപ്പർ ഗുഡ് ഫിലിംസിന്റെ ബാനറിൽ ആർ ബി ചൗധരിരിയാണ്.
‘നിങ്ങളുടെ കുടുംബത്തെ സംരക്ഷിക്കാൻ നിങ്ങൾ എത്ര ദൂരം പോകും?. മുമ്പെങ്ങും കണ്ടിട്ടില്ലാത്ത തരത്തിലുള്ള പ്രണയത്തിന്റെയും സൗഹൃദത്തിന്റെയും പ്രതികാരത്തിന്റെയും ഇതിഹാസ കഥയ്ക്ക് സാക്ഷ്യം വഹിക്കാൻ തയ്യാറാകൂ. കുമ്മാട്ടിക്കളിയിലൂടെ മാധവ് സുരേഷ് വെള്ളിത്തിരയിൽ അരങ്ങേറ്റം കുറിക്കുകയാണ്. ചിത്രത്തിന്റെ ഫസ്റ്റ് ലുക്ക് പ്രഖ്യാപിക്കുന്നതിൽ അഭിമാനമുണ്ട്. നിങ്ങളുടെ അടുത്തുള്ള സിനിമാശാലകളിലേയ്ക്ക് ചിത്രം ഉടൻ വരുന്നു’ എന്ന് കുറിച്ചു കൊണ്ടാണ് കുമ്മാട്ടിക്കളിയുടെ ഫസ്റ്റ് ലുക്ക് സുരേഷ് ഗോപി പങ്കുവെച്ചിരിക്കുന്നത്.
സൂപ്പർഗുഡ് ഫിലിംസിന്റെ 98 -ാമത്തെ ചിത്രമാണിത്. യാമി സോന ആണ് ഒരു നായിക. ലെന, ദേവിക സതീഷ്, അനുപ്രഭ, മൈം ഗോപി, അസീസ് നെടുമങ്ങാട് , ദിനേശ് ആലപ്പി,സോഹൻലാൽ, ആൽവിൻ ആന്റണി ജൂനിയർ, സിനോജ് അങ്കമാലി, ധനഞ്ജയ് പ്രേംജിത്ത്, മിഥുൻ പ്രകാശ്, അനീഷ് ഗോപാൽ, റാഷിക് അജ്മൽ തുടങ്ങിയവരാണ് മറ്റ് താരങ്ങൾ. ഛായാഗ്രഹണം: വെങ്കിടേഷ് വി, സംഗീതം: ജാക്സൺ വിജയൻ, പ്രോജക്ട് ഡിസൈനർ: സജിത് കൃഷ്ണ എന്നിവരാണ് മറ്റ് അണിയറ പ്രവർത്തകർ.
