കടന്നു പോകുന്ന സങ്കടകരമായ അവസ്ഥയെ കുറിച്ച് നടി ശ്രുതി രജനീകാന്ത്. ഉറങ്ങാൻ പോലും കഴിയാത്ത അവസ്ഥയിലൂടെയാണ് താൻ കടന്നു പോകുന്നതെന്നും താരം പറഞ്ഞു. ശ്രുതി തന്റെ യൂട്യൂബ് ചാനലിലൂടെയാണ് ഇക്കാര്യം വെളിപ്പെടുത്തിയത്. മനസ് മുഴുവൻ നെഗറ്റീവ് ചിന്തകളായിരിക്കുന്നു എന്നും താരം പറയുന്നു.
മനസ് തുറന്ന് ചിരിച്ചിട്ട് ഏഴ് ആഴ്ചകളോളമായി. ഒന്നും ചെയ്യാൻ പറ്റാത്ത അവസ്ഥ. മനസ് നിറയെ ഒന്നിനും കഴിയില്ലെന്നുള്ള നെഗറ്റീവ് ചിന്തകൾ. ഉറങ്ങണമെന്ന് ആഗ്രഹിച്ചാൽ പോലും സാധിക്കാതെ കണ്ണ് മിഴിച്ച് കിടക്കേണ്ടി വരുന്ന അവസ്ഥയാണ്. ജോലി കഴിഞ്ഞ് ക്ഷീണച്ച് വന്നാലും ഉറങ്ങാൻ പറ്റില്ല. ആദ്യമൊക്കെ കുറേ കരയുമായിരുന്നു പക്ഷേ ഇപ്പൊ അതും ഇല്ല. ഇത് എന്റെ മാത്രം പ്രശ്നമല്ല എന്റെ ജനറേഷനിലെ ഭൂരിഭാഗം പേരും ഇത് അനുഭവിക്കുന്നുണ്ടെന്നും ശ്രുതി വീഡിയോയിൽ പറഞ്ഞു.
ഡിപ്രഷൻ അനുഭവിക്കുന്നവർ ആരെങ്കിലുമുണ്ടെങ്കിൽ എന്നോടൊപ്പം പങ്കുവെക്കാൻ പറഞ്ഞുകൊണ്ട് ഒരു ഇൻസ്റ്റഗ്രാം സ്റ്റോറി ഇട്ടിരുന്നു. എനിക്ക് ഒരുപാട് പേർ മെസേജ് അയച്ചിരുന്നു. ആരും സന്തോഷത്തിലല്ല. ഓക്കെ അല്ലെങ്കിൽ ഓക്കെയല്ലെന്ന് പറയണം. സുഖമല്ലെങ്കിൽ സുഖമല്ലെന്ന് തന്നെ പറയണം. എന്തിനാണ് മുഖം മൂടി ധരിക്കുന്നത്. മനസ് തുറന്നു സംസാരിക്കാൻ തയാറാണെങ്കിൽ കൗൺസലിങ് നല്ലതാണ്. മാനസിക സന്തോഷമാണ് ഏറ്റവും പ്രധാനം. കൈയിൽ പൈസയില്ലെങ്കിലും സന്തോഷത്തോടെ ജീവിക്കാൻ കഴിയുകയെന്ന് പറയുന്നത് ഒരു ഭാഗ്യമാണ് എന്നുമായിരുന്നു താരത്തിന്റെ വാക്കുകൾ.
