ന്യൂഡൽഹി : പ്രധാനമന്ത്രി നരേന്ദ്ര മോദിയെ പുകഴ്ത്തി മുൻ കോൺഗ്രസ് നേതാവ് ഗുലാം നബി ആസാദ് . പല വിഷയങ്ങളിലും താൻ പ്രധാനമന്ത്രിയെ എതിർത്തിരുന്നെന്നും എന്നാൽ ഒരിക്കലും പ്രതികാര മനോഭാവത്തിൽ അദ്ദേഹം പ്രവർത്തിച്ചിട്ടില്ലെന്നും ഗുലാം നബി ആസാദ് പറഞ്ഞു.
ഗുലാം നബി ആസാദിന്റെ ആത്മകഥ കോൺഗ്രസ് നേതാവ് കരൺ സിംഗ് ബുധനാഴ്ച പ്രകാശനം ചെയ്യും. ഇതുമായി ബന്ധപ്പെട്ട് ദേശീയ മാദ്ധ്യമത്തോട് സംസാരിക്കവെയാണ് ഗുലാം നബി ആസാദ് പ്രധാനമന്ത്രിയെ പ്രശംസിച്ചത്.
ആർട്ടിക്കിൾ 370, സിഎഎ, ഹിജാബ് തുടങ്ങിയ വിഷയങ്ങളിൽ ഞാൻ പ്രധാനമന്ത്രിയെ കഠിനമായി വിമർശിച്ചു , എന്നാൽ അദ്ദേഹം ഒരിക്കലും പ്രതികാര ബോധത്തോടെ രാഷ്ട്രീയത്തിൽ പെരുമാറിയിട്ടില്ല . ഇതിന്റെ ക്രെഡിറ്റ് ഞാൻ അദ്ദേഹത്തിന് നൽകണം. പ്രധാനമന്ത്രി എപ്പോഴും ഒരു ലിബറൽ രാഷ്ട്രീയക്കാരനെപ്പോലെയാണ് , ഒരു രാഷ്ട്രതന്ത്രജ്ഞനെപ്പോലെയാണ് പെരുമാറിയിരുന്നത്.
പുസ്തകത്തിൽ തന്റെ പഴയ സഹപ്രവർത്തകരായ ജയറാം രമേഷ്, സൽമാൻ ഖുർഷിദ് തുടങ്ങിയ നേതാക്കൾക്കെതിരെ അദ്ദേഹം നിരവധി ആരോപണങ്ങൾ ഉന്നയിച്ചിട്ടുണ്ട്. ഇപ്പോൾ കോൺഗ്രസിന് താഴെത്തട്ടിലുള്ള നേതാവില്ലെന്നും അദ്ദേഹം പറയുന്നു . ഗുലാം നബി ആസാദ് തന്റെ രാഷ്ട്രീയ അനുഭവങ്ങളും 50 വർഷത്തെ നിരവധി സംഭവങ്ങളും ആത്മകഥയിൽ പരാമർശിച്ചിട്ടുണ്ട്.
