കോഴിക്കോട്: എലത്തൂർ ട്രെയിൻ തീവെയ്പ്പിലെ പ്രതി ഷഹറൂഖ് സെയ്ഫി പിടിയിലായതിൽ തീവ്രവാദ ആരോപണവും വിദ്വേഷവും പരത്തരുതെന്ന് നടനും അഭിഭാഷകനുമായ ഷുക്കൂർ. ഈ സമയം ജാഗ്രത പുലർത്തണം. പ്രതിയുടെ പേരും മതവും നോക്കി ഒരു സമൂഹത്തിനെതിരെ ചിലർ വിദ്വേഷം പരത്തും. പ്രതിയാണെന്ന് സംശയിക്കപ്പെടുന്ന ആൾ കുറ്റം ചെയ്തുവെന്ന് തെളിഞ്ഞാൽ നിയമപ്രകാരമുള്ള ശിക്ഷ ലഭിക്കട്ടെ എന്നും നടൻ ഫേയ്സ്ബുക്കിൽ കുറിച്ചു.
‘എലത്തൂർ ട്രെയിൻ ആക്രമണ കേസ് പ്രതിയെ മഹാരാഷ്ട്രയിൽ നിന്ന് അറസ്റ്റ് ചെയ്തതായി ദൃശ്യ മാദ്ധ്യമങ്ങൾ അറിയിക്കുന്നുണ്ട്. തീവ്രവാദ ആരോപണം മുതൽ ഇതര സംസ്ഥാന വിദ്വേഷം വരെ സൃഷ്ടിക്കാനും പരത്താനും ഇത്തരം സന്ദർഭങ്ങൾ ഇടയാവരുത് എന്ന ജാഗ്രത പുലർത്തേണ്ട സമയമാണ്’.
‘പ്രതിയുടെ പേരും മതവും നോക്കി ഒരു സമൂഹത്തെ മുഴുവൻ കത്തിയ്ക്കാൻ തുനിഞ്ഞിറങ്ങിയ ക്രിമിനലുകൾ വിദ്വേഷം പരത്തും. അവരിൽ നിന്ന് സ്വയം രക്ഷ നേടണം. സമൂഹത്തെ കാക്കണം. പ്രതിയാണെന്ന് സംശയിക്കപ്പെടുന്ന ആൾ കുറ്റം ചെയ്തുവെന്ന് തെളിഞ്ഞാൽ നിയമപ്രകാരമുള്ള ശിക്ഷ ലഭിക്കട്ടെ. ഇത്തരം സംഭവങ്ങൾ ആവർത്തിക്കാതിരിക്കട്ടെ’- എന്നാണ് ഷുക്കൂർ വക്കീലിന്റെ ഫേയ്സ്ബുക്ക് കുറിപ്പ്.
