മൈക്രോ ബ്ലോഗിംഗ് പ്ലാറ്റ്ഫോമായ ട്വിറ്ററിന്റെ നീലക്കിളിയെ തിരികെ കൊണ്ട് വന്ന് ഇലോൺ മസ്‌ക്. ട്വിറ്ററിന്റെ ലോഗോയായ ബ്ലൂ ബേർഡ് ലോഗോ പുനസ്ഥാപിച്ചു. കഴിഞ്ഞ ദിവസം നീലക്കിളിയെ പിന്തള്ളിക്കൊണ്ട് നായയുടെ ചിത്രം ലോഗോ സ്ഥാനം പിടിച്ചെടുത്തിരുന്നു. ഡോഗ് കോയിൻ എന്ന പേരിലുള്ള ക്രിപ്റ്റോ കറൻസിയുടെ ഡോഗി മീമിന് സമാനമായിരുന്നു ട്വിറ്ററിന്റെ ലോഗോ. വ്യക്തമായ കാരണങ്ങൾ വിശദമാക്കാതെയാണ് ട്വിറ്ററിന്റെ സിഇഒ ഇലോൺ മസ്‌ക് നീലക്കിളിയെ മാറ്റി നായയെ കൊണ്ടുവന്നത്.
നായയെ ലോഗോയുടെ സ്ഥാനത്തേക്ക് കൊണ്ടുവന്നതിന് പിന്നാലെ താൻ മുമ്പ് ഒരു അഞ്ജാതനുമായി നടത്തിയ സംഭാഷണത്തിന്റെ സ്‌ക്രീൻ ഷോട്ടുകളും മസ്‌ക് പങ്കുവെച്ചിരുന്നു. പക്ഷിയെ മാറ്റി നായയെ ലോഗോ ആക്കൂ എന്നായിരുന്നു ചെയർമാൻ എന്ന പേരിലുള്ള ട്വിറ്റർ അക്കൗണ്ടിൽ നിന്നും മസ്‌കിന് വന്ന സന്ദേശം. ‘നിർദേശിച്ചത് പോലെ’ എന്ന അടിക്കുറിപ്പോട് കൂടിയാണ് മസ്‌ക് സ്‌ക്രീൻ ഷോട്ട് പങ്കുവെച്ചത്.
ട്വിറ്ററിന്റെ ലോഗോയിൽ നായ വന്നതോടുകൂടി ഡോഗ് കോയിന്റെ മൂല്യം 30 ശതമാനം ഉയർന്നിരുന്നു. ലോഗോ മാറ്റി മൂന്ന് ദിവസങ്ങൾക്ക് ശേഷമാണ് നായയെ മാറ്റി നീലക്കിളിയെ വീണ്ടും ലോഗോയിലെത്തിച്ചിരിക്കുന്നത്. 2013-ലാണ് ഡോഗ്കോയിൻ എന്ന ക്രിപ്റ്റോ കറൻസി അവതരിപ്പിക്കപ്പെടുന്നത്. മസ്‌ക് ഈ കറൻസിയെ വളരെയധികം പിന്തുണച്ചിരുന്നു. നീലക്കിളി തിരികെയെത്തിയതോടെ സമ്മിശ്ര പ്രതികരണമാണ് ലഭിക്കുന്നത്.
