ചോളൻമാരുടെ ചരിത്രം പറയുന്ന പൊന്നിയൻ സെൽവന് ശേഷം പാണ്ഡ്യൻമാരുടെ ചരിത്രവും വെള്ളിത്തിരയിൽ. ധരിണി സംവിധാനം ചെയ്യുന്ന ‘യാതിസൈ’ എന്ന ചരിത്ര ചിത്രം സംസാരിക്കുന്നത് പാണ്ഡ്യ വംശത്തെ കുറിച്ചാണ്. 500 കോടി രൂപ ചെലവിലാണ് പൊന്നിയൻ സെൽവൻ നിർമ്മിച്ചതെങ്കിൽ യാതിസൈയുടെ ബജറ്റ് ആറ് കോടി മാത്രമാണ്.
ചെറിയ ബജറ്റിലും ഒരു ചരിത്രകാലഘട്ടത്തിന്റെ ചിത്രം നിർമ്മിക്കുക സാധ്യമാണ് എന്ന് തെളിയിക്കുന്നതാണ് കഴിഞ്ഞ ദിവസം പുറത്തിറങ്ങിയ ട്രെയ്ലർ. ഇതുവരെ ആറ് മില്യൺ (60 ലക്ഷം) ആളുകളാണ് ട്രെയ്ലർ കണ്ടിരിക്കുന്നത്. മുൻനിര താരങ്ങളില്ലാത്തെ ചിത്രത്തിന്റെ ഉള്ളടക്കത്തിലും മേക്കിങ്ങിലുമാണ് പ്രതീക്ഷ.
ശക്തി മിത്രൻ, ഗുരു സോമസുന്ദരം, രാജലക്ഷ്മി, സെയോൺ, ചന്ദ്രകുമാർ, സുഭദ്ര, സമർ, സെമ്മലർ അന്നം, വിജയ് സെയോൺ, എസ് റൂബി ബ്യൂട്ടി എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. മണിരത്നത്തിന്റെ പൊന്നിയിൻ സെൽവൻ 2 എത്തുന്നതിന് ഒരാഴ്ച മുൻപേയാണ് യാതിസൈ റിലീസിനെത്തുന്നത്.
യാതിസൈ ഏപ്രിൽ 21നും പി എസ് 2 ഏപ്രിൽ 28 നാണ് റിലീസ് ചെയ്യുന്നത്. രണ്ട് ചരിത്ര സിനിമകളുടെ ബോക്സ് ഓഫീസ് പോരാട്ടത്തിനും ഏപ്രിൽ സാക്ഷ്യം വഹിക്കും.
മണിരത്നം സംവിധാനം ചെയ്ത പൊന്നിയൻ സെൽവൻ തമിഴിലെ എറ്റവും വലിയ ബജറ്റ് സിനിമയാണ്. ഇന്ത്യൻ സിനിമയിലെ മുൻനിര താരങ്ങളാണ് ചിത്രത്തിൽ അഭിനയിച്ചത്. അതിനാൽ തന്നെ പൊന്നിയിൻ സെൽവന് വൻ സ്വീകാര്യതയാണ് രാജ്യമെമ്പാടും ലഭിച്ചത്.
