ശ്രീനിവാസൻ മോഹൻലാലിനെ കുറിച്ച് നട്ത്തിയ പരാമർശങ്ങൾ വിഷമം ഉണ്ടാക്കിയെന്ന് നടൻ സിദ്ദിഖ്. പ്രേംനസീര്‍ ആദ്യമായി സംവിധാനം ചെയ്യാനിരുന്ന ചിത്രത്തില്‍ മോഹന്‍ലാലിനെ നായകനാക്കാന്‍ ആഗ്രഹിച്ചിരുന്നുവെന്നും അദ്ദേഹത്തിന് അതില്‍ താല്‍പര്യമില്ലായിരുന്നുവെന്നും ശ്രീനിവാസന്‍ പറഞ്ഞു. കൂടാതെ ഒരു വേദിയില്‍ ഈയിടെ മോഹന്‍ലാല്‍ ശ്രീനിവാസനെ ചുംബിച്ചതിനെക്കുറിച്ച് ചോദിച്ചപ്പോള്‍ അതുകൊണ്ടല്ലേ അദ്ദേഹത്തെ കംപ്ലീറ്റ് ആക്ടര്‍ എന്ന് വിളിക്കുന്നതെന്നും ശ്രീനിവാസന്‍ പറഞ്ഞിരുന്നു. ഇതിനെ കുറിച്ചുള്ള ചോദ്യങ്ങൾക്കാണ് സിദ്ദിഖ് ഇത്തരത്തിൽ പ്രതികരിച്ചത്. ശ്രീനിവാസന്‍ അങ്ങനെ പറയരുതായിരുന്നുവെന്നും ഇതൊരു പ്രശ്‌നമാക്കാന്‍ മോഹന്‍ലാലും ആഗ്രഹിക്കുന്നില്ലെന്നുമാണ് ഒരു അഭിമുഖത്തിൽ സിദ്ദിഖ് പറഞ്ഞത്.
‘എനിക്ക് അതെ കുറിച്ച് പറയാന്‍ തന്നെ ഇഷ്ടമല്ല. അങ്ങനെയൊന്നും പറയേണ്ടായിരുന്നു എന്നാണ് തോന്നുന്നുത്. എന്തിനാ ശ്രീനിയേട്ടന്‍ ഒക്കെ അങ്ങനെ പറഞ്ഞത് എന്ന് തോന്നി. കാരണം ശ്രീനിയേട്ടന്‍ നമ്മള്‍ അത്രയും ഇഷ്ടപ്പെടുന്ന ഒരു വ്യക്തിയാണ്. ശ്രീനിയേട്ടന്റെ വായില്‍ നിന്ന് അങ്ങനെ വേറാര്‍ക്കും വിഷമമുണ്ടാകുന്ന ഒരു വാചകം വരുന്നത് എനിക്ക് ഒട്ടും ഇഷ്ടമുള്ള കാര്യമല്ല.
എന്തുകൊണ്ടോ അങ്ങനെ സംഭവിച്ച് പോയതായിരിക്കും. അതിനെ ചൊല്ലി മോഹന്‍ലാലും ഇതൊരു പ്രശ്‌നമാക്കാന്‍ ആഗ്രഹിക്കുന്നില്ല.അതുകൊണ്ട് അത് അങ്ങനെ തേഞ്ഞു മാഞ്ഞു പോട്ടെ എന്നാണ് ഞാന്‍ ആഗ്രഹിക്കുന്നത്. ഈ പറഞ്ഞ വാക്ക് അല്ലേ എല്ലാവരും ചര്‍ച്ചയാക്കുന്നത്. ഇവര്‍ ചെയ്തിട്ടുള്ള എത്രയോ നല്ല സിനിമകളും പറഞ്ഞിട്ടുള്ള എത്രയോ നല്ല വാക്കുകളും നമ്മളുടെ മുന്നില്‍ കിടക്കുന്നുണ്ട്. ഇന്നും ജനങ്ങള്‍ പറയുന്നത് പോലെ എല്ലാത്തിനും അതിന്റേതായ സമയമുണ്ട് ദാസാ.”- സിദ്ധിഖ് പറഞ്ഞു.
