മെക്‌സിക്കോ: ശിലയിൽ നിർമ്മിച്ച ആയിരം വർഷം പഴക്കമുള്ള സ്‌കോർ ബോർഡ് മെക്‌സിക്കോയിൽ കണ്ടെത്തി. പുരാതന മായൻ സംസ്‌കാരത്തിന്റെ ഭാഗമായ പന്ത് കളിയുടെ സ്‌കോർ ബോർഡാണ് കണ്ടെടുത്തത്. സോക്കർ പോലുള്ള കായിക ഇനത്തിന്റെ സ്‌കോർ ബോർഡാണ് ഇതെന്ന് കരുതപ്പെടുന്നു. മായൻ സംസ്‌കാരം നിലനിന്നിരുന്ന ചിചനിറ്റ്‌സോ പ്രദേശത്ത് പുരാവസ്തു ഗവേഷകർ നടത്തിയ ഉത്ഖനനത്തിലാണ് ശില ബോർഡ് കണ്ടെടുത്തത്. മെക്‌സിക്കോയിലെ നാഷണൽ ഇൻസ്റ്റിറ്റ്യൂട്ട് ഓഫ് ആന്ത്രോപോളജി ആന്റ് ഹിസ്റ്ററിയുടെ നേതൃത്വത്തിലാണ് ഉത്ഖനനം നടത്തിയത്.
വ്യത്തത്തിലുള്ള ബോർഡിന് 32 സെന്റീമീറ്റർ വ്യാസവും
40 കിലോഗ്രം ഭാരവുമുണ്ട്. ഹൈറോഗ്ലാഫിക്ക് ലീപിയിൽ കളി സംബന്ധിച്ച വിവരങ്ങൾ ആലേഖനം ചെയ്തിട്ടുണ്ട്. കൂടാതെ രണ്ട് കളിക്കാരുടെ നടുവിലായി പന്തിന്റെ ചിത്രവും കൊത്തിവച്ചിട്ടുണ്ട്.
മായൻ സംസ്‌കാരത്തിൽ ഹൈറോഗ്ലാഫിക്ക് ലിപികൾ ഉപയോഗിക്കുന്നത് അപൂർവ്വമാണ്. എഡി 800- എഡി 900 ഇടയിലുള്ളതാണ് സ്‌കോർ ബോർഡ് നിർമ്മിച്ചതെന്നാണ് കരുതപ്പെടുന്നത്. മെസോ- അമേരിക്കൻ സംസ്‌കൃതിയുടെ ഭാഗമായി അനുഷ്ഠിക്കപ്പെടുന്ന ആചാരത്തിന്റെ ഭാഗമായുള്ള കായിക വിനോദമാണ് ഇത്- പുരാവസ്തു ഗവേഷകനായ ഫ്രാൻസിസ്‌കോ പെറസ് പറയുന്നു.
യുനസ്‌കോയുടെ പൈതൃക പട്ടികയിൽ ഇടം നേടിയ പ്രദേശമാണ് മെക്‌സിക്കോയിലെ ചിചനിറ്റ്‌സോ. മായൻ സംസ്‌കാരത്തിന്റെ ചരിത്ര ശേഷിപ്പുകൾ കണ്ടെത്തിയ സ്ഥലം കൂടിയാണിത്. രണ്ട് ലക്ഷത്തിലധികം പേരാണ് വർഷം തോറും ഇവിടം സന്ദർശിക്കുന്നത്.
