ഗുവാഹട്ടി: ലോക റെക്കോർഡ് സൃഷ്ടിക്കാനൊരുങ്ങി അസം. 12,000 കലാകാരന്മാർഒറ്റ വേദിയിൽ അണിനിരന്ന് ഏറ്റവും വലിയ ‘ബിഹു നൃത്തം’ അവതരിപ്പിക്കും. അതിനായി ഗുവാഹട്ടിയിലെ സരുസജായിയിലുള്ള ഇന്ദിരാഗാന്ധി അത്ലറ്റിക് സ്റ്റേഡിയത്തിന്റെ വേദിയൊരുങ്ങിക്കഴിഞ്ഞു. കലാകാരന്മാരെല്ലാരും തീവ്രമായ പരിശീലനത്തിലാണ്. നാളെയോടെ പരിശീലനങ്ങൾ സമാപിക്കും. ബിഹു ഉത്സവം ആരംഭിക്കുന്ന ഏപ്രിൽ 14-നാണ് മെഗാ പരിപാടി നടക്കുക. അസമീസ് പുതുവർഷത്തിന്റെ ആരംഭം കുറിക്കാൻ എല്ലാ വർഷവും ഏപ്രിലിൽ ബൊഹാഗ് ബിഹു എന്നും വിളിക്കപ്പെടുന്ന രൊംഗാളി ബിഹു ആഘോഷിക്കുന്നു. ഈ വർഷം, ഏപ്രിൽ 14-നാണ് ഉത്സവം ആരംഭിക്കുന്നത്. നൃത്തപരിശീലന സമയത്ത് സ്റ്റേഡിയത്തിലെത്തിയ അസം മുഖ്യമന്ത്രി ഹിമന്ത ബിശ്വ ശർമ്മ നർത്തകരെ പ്രോത്സാഹിപ്പിക്കുകയും നർത്തകർക്ക് രൊംഗാളി ബിഹുവിനോട് അനുബന്ധിച്ച് സമ്മാനങ്ങൾ നൽകുമെന്ന് പ്രഖ്യാപിക്കുകയും ചെയ്തു.
അസമിന്റെ ദേശീയോത്സവമാണ് ബിഹു. കാർഷികവൃത്തി ആരംഭിക്കുന്നതിന്റെ ആഘോഷമാണ് രൊംഗാളി ബിഹു. പുതുവത്സര ദിനമാണ് ഇത്. വർഷത്തിൽ മൂന്ന് ബിഹുവാണ് അസമുകാർ ആഘോഷിക്കുക. ഒക്ടോബർ മാസത്തിന്റെ മധ്യത്തിൽ കാതി ബിഹുവും ജനുവരിയുടെ മധ്യത്തിൽ മാഗ് ബിഹുവും ഏപ്രിൽ മാസത്തിന്റെ മധ്യത്തിൽ രൊംഗാളി ബിഹുവുമാണ് ഈ ആഘോഷങ്ങൾ. കാതി ബിഹു, കൊംഗാളി ബിഹു എന്നും മാഗ് ബിഹു, ബൊഗാളി ബിഹു എന്നും രൊംഗാളി ബിഹു, ബൊഹാഗ് ബിഹു എന്നീ പേരുകളിലും വിളിക്കപ്പെടുന്നു. കാർഷികവൃത്തിയുടെയും പുതുവത്സരത്തിന്റെയും ആരംഭത്തിൽ ആഘോഷിക്കുന്ന രൊംഗാളി ബിഹുവാണ് ഇതിൽ ഏറ്റവും പ്രധാനപ്പെട്ടത്. രൊംഗാളി ബിഹു എന്നാൽ ആനന്ദത്തിന്റെ ഉത്സവമെന്നും അറിയപ്പെടുന്നു.വസന്തകാലത്തിന്റെ വരവ് അറിയിച്ചുകൊണ്ടെത്തുന്ന രൊംഗാളി ബിഹു അസമുകാർക്ക് ഏറ്റവും സന്തോഷകരമായ അനുഭവമാണ്. അന്നാണ് കർഷകർ വിത്തെറിയുന്നത്. രൊംഗാളി ബിഹു പ്രധാനമായും ഏപ്രിൽ 14-നും 15-നുമാണ് ആഘോഷിക്കുക എങ്കിലും ഏഴ് ദിവസം നീണ്ടുനിൽക്കുന്ന വ്യത്യസ്ത ചടങ്ങുകളുണ്ടാകും. വീട്ടിലെ സ്ത്രീകൾ അരിയും തേങ്ങയും ചേർത്ത് പിത്ത, ലരു, ജോൽപ്പൻ എന്നീ പലഹാരങ്ങൾ ബിഹു സ്പെഷലായി ഉണ്ടാക്കും. അരിയുണ്ട, എള്ളുണ്ട എന്നിവയും ഓരോ വീട്ടിലും ബിഹു പ്രമാണിച്ച് ഉണ്ടാക്കും.
ബിഹു ഉത്സവവുമായി ബന്ധപ്പെട്ട ഒരു നാടോടി നൃത്തമാണ് ബിഹു നൃത്തം. ആസാമീസ് സംസ്കാരത്തിന്റെ ഒരു പ്രധാന ഭാഗമാണ് ഈ നൃത്തം. ഒരു ഗ്രൂപ്പായി അവതരിപ്പിക്കുന്ന ബിഹു നർത്തകർ സാധാരണയായി ചെറുപ്പക്കാരും യുവതികളുമാണ്. വേഗതയേറിയ ചുവടുകളും കൈ ചലനങ്ങളും ഈ നൃത്തശൈലിയുടെ സവിശേഷതയാണ്. നർത്തകരുടെ പരമ്പരാഗത വസ്ത്രധാരണം വർണ്ണാഭമായതും ചുവന്ന നിറമുള്ളതുമാണ്. ഇത് സന്തോഷത്തെയും ഊർജ്ജസ്വലതയെയും സൂചിപ്പിക്കുന്നു. നൃത്തരൂപത്തിന്റെ ഉത്ഭവം അജ്ഞാതമാണ്. നർത്തകരായ ചെറുപ്പക്കാരും യുവതികളും നൃത്ത വേദിയിലേക്ക് പതുക്കെ നടക്കുന്നതിലൂടെയാണ് നൃത്തം ആരംഭിക്കുന്നത്.
Comments