പച്ചപ്പ് പുതച്ച് കുന്നിൻ ചെരിവ്. നീല പുതച്ച ആകാശം. പഞ്ഞിക്കെട്ട് പോലെയുള്ള മേഘശകലങ്ങൾ. കമ്പ്യൂട്ടർ ഉപയോഗിക്കുന്നവർക്ക ഒരു പരിചയപ്പെടുത്തലിന്റെ ആവിശ്യമില്ലാത്ത ചിത്രം. ഈ ചിത്രത്തിന് പിന്നിലെ കഥ തികച്ചും ലളിതവും എന്നാൽ മനോഹരവുമാണ്. ബ്ലിസ് എന്നറിയപ്പെടുന്ന ഈ ഡെസ്ക്ടോപ്പ് വാൾപേപ്പർ ലോകത്ത് ഏറ്റവും കൂടുതൽ ആളുകൾ കണ്ട ഫോട്ടോയാണെന്ന് കരുതപ്പെടുന്നു. ഈ ഫോട്ടോ എടുത്തത് ആരാണ്, അയാൾക്ക് ഇതിനായി മൈക്രോസോഫ്റ്റ് എത്ര പൈസ നൽകി തുടങ്ങിയ കാര്യങ്ങൾ അറിയാമോ?
1996 ലെ മഞ്ഞുകാലത്ത് ഫോട്ടോഗ്രാഫർ ചക്ക് ഒ റിയർ എന്നയാളാണ് ദി ബ്ലിസ് എന്ന ചിത്രം പകർത്തിയത്. കാലിഫോർണിയയിൽ ഭാവി വധുവിനെ കാണാൻ പോകുമ്പോഴാണ് അതിമനോഹരമായ ചിത്രം എടുത്തത്. നാഷണൽ ജിയോഗ്രാഫിയിൽ ജോലി ചെയ്തിരുന്ന ചക്ക് ഒ റിയർ എപ്പോഴും ഒരു ക്യാമറ കൈവശം വയ്ക്കാറുണ്ടായിരുന്നു. വഴിയരികിൽ കാണുന്ന നല്ല സ്ഥലങ്ങൾ അദ്ദേഹം ക്യാമറയിൽ പകർത്തും.
ഒരു അഭിമുഖത്തിൽ ചക്ക് ഒ റിയർ അന്നത്തെ ആ ദിവസം ഓർത്തെടുത്തു. പച്ചപുല്ല് പിടിച്ച് നിൽക്കുന്ന കുന്നിൻ പുറവും ആകാശത്ത് മനോഹരമായ വെളുത്ത മേഘങ്ങളും ഉള്ള ശൈത്യകാല ദിനമായിരുന്നു അത്. മനോഹരമായ ആ സ്ഥലത്ത് എത്തിയപ്പോൾ രണ്ട് ക്ലിക്ക് ചെയ്യാതിരിക്കാൻ സാധിച്ചില്ല ചക്ക് പറയുന്നു. ലോകമെമ്പാടുമുള്ള മിക്കവാറും എല്ലാ കമ്പ്യൂട്ടറുകളിലും ഡിഫോൾട്ട് ഡെസ്ക്ടോപ്പ് ഇമേജായി മാറുമെന്നും അറിയാതെയായണ് ഇദ്ദേഹം ക്യാമറയിൽ ഈ മനോഹര ദൃശ്യം പകർത്തിയത്.
ചക്ക് ഒ റിയർ ഈ ചിത്രങ്ങൾ ഫോട്ടോ സ്റ്റോക്ക് ഏജൻസിയായ കോർബിസിന് നൽകി. പിന്നീട്, മൈക്രോസോഫ്റ്റ് ഈ ചിത്രം കാണുകയും. അത് വാങ്ങുകയും ചെയ്തു. അനൗദ്യോഗിക റിപ്പോർട്ട് അനുസരിച്ച് മൈക്രോസോഫ്റ്റിന്റെ ബ്ലിസ് ഫോട്ടോയ്ക്കായി ചക്ക് ഒ റിയറിന് ഒരു ലക്ഷം ഡോളർ നൽകിയെന്നാണ് സൂചന. അതായത് 81 ലക്ഷത്തിലേറെ രൂപ. മൈക്രോസോഫ്റ്റ് എക്സ്പിക്ക് വേണ്ടി ഉപയോഗിച്ചിരുന്നത് ചക്ക് ഒ റിയറിന്റെ മഞ്ഞുകാല ഫോട്ടോയാണ്.
പക്ഷെ ഇതേ പ്രദേശത്തിന്റെ വേനൽക്കാല ചിത്രം വാങ്ങുന്നതിന് മൈക്രോസോഫ്റ്റ് വെറും 45 ഡോളർ മാത്രമാണ് നൽകിയത്. പീറ്റർ ബുറിയൻ എന്നയാളിൽ നിന്നുമാണ് മൈക്രോസോഫ്റ്റ് ചിത്രം വാങ്ങിയത്.
Comments