ഉയരം കുറവായതിനാൽ കാമുകിയെ കിട്ടാനില്ലെന്ന വിഷമത്തിൽ ഉയരം കൂട്ടാൻ ശസ്ത്രക്രിയ നടത്തി 41-കാരൻ. സങ്കീർണമായ ശസ്ത്രക്രിയയ്‌ക്ക് വിധേയനായ അമേരിക്കൻ സ്വദേശി വരുന്ന ജൂൺ മാസത്തോടെ ഉയരം കൂടുമെന്ന പ്രതീക്ഷയിലാണ്. ആകെ 5 ഇഞ്ച് കൂടുമെന്നാണ് ഡോക്ടർമാരുടെ വാഗ്ദാനം. അഞ്ചടി അഞ്ചിഞ്ചായിരുന്നു മോസെസ് ജിബ്‌സൺ എന്ന യുവാവിന്റെ ഉയരം. ഇത് അഞ്ച ഇഞ്ച് കൂടി വർധിപ്പിക്കുകയാണ് ശസ്ത്രക്രിയുടെ ലക്ഷ്യം. അമേരിക്കയിലെ മിന്നെസോട്ട സ്വദേശിയാണ് ജിബ്‌സൺ. ഉയരം കുറവായത് തന്നെ വളരെയധികം വിഷമിപ്പിച്ചിരുന്നതായി അദ്ദേഹം പറയുന്നു.
” ആത്മവിശ്വാസത്തെ പോലും ബാധിച്ചിരുന്നു. സ്ത്രീകളുടെ മുമ്പിലൊക്കെ പോകുമ്പോൾ വളരെ ബുദ്ധിമുട്ടാണ്. എന്റെ ഡേറ്റിംഗ് ലൈഫിനെ വളരെയധികം ബാധിച്ചു. ഷൂസിൽ പലതും തിരുകി കയറ്റി അതിന്മേൽ നടക്കാൻ ശ്രമം നടത്തിയിരുന്നു. പക്ഷെ, അപ്രകാരം ചെയ്ത് ഉയരം തോന്നിപ്പിക്കുന്നതിനൊക്കെ പരിധിയുണ്ട്. ” ജിബ്‌സൺ പറഞ്ഞു.
രണ്ട് ഘട്ടമായാണ് ജിബ്‌സൺ സർജറി നടത്തിയത്. ആദ്യ ശസ്ത്രക്രിയ 2016ലായിരുന്നു. സോഫ്റ്റ് വെയർ എഞ്ചിനീയറായ അദ്ദേഹം 75,000 ഡോളർ ചിലവഴിച്ചായിരുന്നു ശസ്ത്രക്രിയ ചെയ്തത്. തുടർന്ന് കാലക്രമേണ 3 ഇഞ്ച് ഉയരം കൂടി. നിലവിൽ 5 അടി എട്ട് ഇഞ്ചാണ് ജിബ്‌സണിന്റെ ഉയരം. കഴിഞ്ഞയിടയ്‌ക്കായിരുന്നു സങ്കീർണമായ രണ്ടാമത്തെ സർജറി നടത്തിയത്. വരുന്ന ജൂൺ മാസത്തോടെ 41-കാരന്റെ ഉയരം അഞ്ചടി പത്ത് ഇഞ്ചാകുമെന്ന് ഡോക്ടർമാർ അറിയിച്ചു. രണ്ടാമത്തെ ശസ്ത്രക്രിയയ്‌ക്ക് 98,000 ഡോളറായിരുന്നു ചിലവാക്കിയത്. ശസ്ത്രക്രിയയ്‌ക്കിടെ അദ്ദേഹത്തിന്റെ കാലുകളിലെ രണ്ട് സുപ്രധാന എല്ലുകൾ ഒടിഞ്ഞിരുന്നു. മാഗ്നെറ്റിക് സ്‌ക്രൂ ഘടിപ്പിച്ചാണ് ഡോക്ടർമാർ ഇത് ശരിയാക്കിയത്. നിലവിൽ അസഹനീയമായ വേദനയ്‌ക്കിടയിലും ഉയരം കൂടുമെന്ന സന്തോഷത്തിലാണ് ജിബ്‌സൺ.
