മുംബൈ: മഹാരാഷ്ട്രയിലെ ജയിലുകളിൽ നിരീക്ഷണം ശക്തമാക്കാൻ നൈറ്റ് വിഷൻ ഡ്രോൺ ക്യാമറകൾ സ്ഥാപിക്കുന്നു. ജയിൽ അന്തേവാസികളുടെ നിരീക്ഷണം, സുരക്ഷ എന്നിവ ഉറപ്പാക്കാനാണ് ക്യാമറകൾ സ്ഥാപിക്കുന്നത്. സംസ്ഥാന ജയിൽ വകുപ്പാണ് ഇക്കാര്യത്തിൽ തീരുമാനം എടുത്തത്.
ആദ്യഘട്ടത്തിൽ 12- ജയിലുകളിൽ പദ്ധതി നടപ്പിലാക്കും. ജയിൽ സുരക്ഷ ഉറപ്പാക്കുന്നതിനായി ഡ്രോണുകൾ ഉപയോഗിക്കും. വിവിധ ജയിലുകളിലെ സെൻസിറ്റീവ് പ്രദേശങ്ങളിൽ രാത്രി സമയങ്ങൾ ഉൽപ്പെടെ ഡ്രോണുകൾ നിരീക്ഷിക്കും. ഇതുപ്രകാരം ജയിൽ അന്തേവാസികളുടെ പ്രവർത്തനങ്ങൾ കാര്യക്ഷമമായി നിരീക്ഷിക്കുമെന്ന് എഡിജിപി അമിതാ ഗുപ്ത പറഞ്ഞു. ഉത്തർപ്രദേശിന് ശേഷം ജയിലുകളുടെ സുരക്ഷയ്‌ക്കായി ഡ്രോൺ ക്യാമറകൾ ഉപയോഗിക്കുന്ന രണ്ടാമത്തെ സംസ്ഥാനമായി മഹാരാഷ്‌ട്ര മാറിയെന്നും എഡിജിപി കൂട്ടിച്ചേർത്തു.
കേന്ദ്ര ആഭ്യന്തര മന്ത്രാലയം പുറപ്പെടുവിച്ച ഉത്തരവുകൾ പ്രകാരം ഡ്രോണുകളുടെ ഉപയോഗത്തിന് സംസ്ഥാന സർക്കാർ മുൻഗണന നൽകിയിട്ടുണ്ട്. തുടക്കത്തിൽ യെരവാഡ, കോലാംപൂർ, നാസിക്, സംഭാജി നഗർ, താനെ, അമരാവതി, നാഗ്പൂർ, കല്യാൺ, ചന്ദ്രപൂർ എന്നിവിടങ്ങളിലാണ് ഡ്രോണുകൾ സ്ഥാപിക്കുന്നത്.
