ലണ്ടൻ : 10 ഡൗണിംഗ് സ്ട്രീറ്റിലെ തന്റെ മേശപ്പുറത്തുള്ള ഗണേശ പ്രതിമയുടെ പ്രാധാന്യം വിശദീകരിച്ച് ബ്രിട്ടീഷ് പ്രധാനമന്ത്രി ഋഷി സുനക് . അടുത്തിടെ പ്രാദേശിക തെരഞ്ഞെടുപ്പിന് മുന്നോടിയായി ‘കൺസർവേറ്റീവ് ഹോം’ വെബ്സൈറ്റിന് നൽകിയ അഭിമുഖത്തിലാണ് ഋഷി സുനക് തന്റെ വിശ്വാസങ്ങളെ പറ്റി തുറന്ന് പറഞ്ഞത് .
“എന്റെ മേശപ്പുറത്ത് ഒരു ഗണപതിയുണ്ട്, അത് വളരെ സാധാരണമാണ്. സാധാരണഗതിയിൽ, നിങ്ങൾ ഒരു പുതിയ ജോലിയോ അത്തരത്തിലുള്ള മറ്റെന്തെങ്കിലുമോ ആരംഭിക്കുമ്പോഴോ അല്ലെങ്കിൽ ഒരു പുതിയ ബിസിനസ്സ് ഏറ്റെടുക്കുമ്പോഴോ, നിങ്ങൾ ഒരു പുതിയ സംരംഭം ആരംഭിക്കുമ്പോഴോ ഗണപതി നിങ്ങൾക്ക് ഭാഗ്യം നൽകുന്നതിനാൽ നിങ്ങൾ സാധാരണയായി ഗണപതിക്ക് ഒരു പ്രാർത്ഥന അർപ്പിക്കും. ചാൻസലറായപ്പോൾ ഞാൻ അത് ചെയ്തിരുന്നു . ഞാൻ ചാൻസലറായിരുന്ന കാലം മുതൽ ഈ ഗണേശ വിഗ്രഹം എന്നോടൊപ്പമുണ്ടായിരുന്നു, തുടർന്ന് 10-ാം നമ്പറിലുള്ള എന്റെ മേശയിലേക്കും മാറി. മിക്ക ഇന്ത്യൻ കുടുംബങ്ങളും ഒരു പുതിയ ജോലിയുടെ തുടക്കത്തിലോ അല്ലെങ്കിൽ ഒരു പുതിയ വീട്ടിലോ ഗണേശനോട് പ്രാർത്ഥിക്കും, അതാണ് എപ്പോഴും ആദ്യം ചെയ്യുന്നത്. അതിനാൽ, ഈ ഗണേശ വിഗ്രഹം ഇവിടെയുമുണ്ട് ” ഋഷി സുനക് പറയുന്നു.
പാരമ്പര്യമായി കൈവന്ന ഹൈന്ദവാചാരങ്ങൾ മുറുകെപ്പിടിക്കുന്ന ആളാണ് ഋഷി. തെരേസ മേ ക്യാബിനറ്റിൽ മന്ത്രിയായതും അദ്ദേഹം ഭഗവത് ഗീത തൊട്ട് സത്യവാചകം ചൊല്ലിയിരുന്നു.’ഞാൻ ഇപ്പോൾ ബ്രിട്ടനിലെ പൗരനാണ്. പക്ഷെ എന്റെ മതം ഹിന്ദു ആണ്. എന്റെ മതപരവും സാംസ്കാരികവുമായ പൈതൃകം ഭാരതീയമാണ്. ഞാനൊരു ഹിന്ദുവാണെന്നും എന്റെ സ്വത്വം ഹിന്ദുവാണെന്നും ഞാൻ അഭിമാനത്തോടെ പറയുന്നു,’ അദ്ദേഹം അന്ന് പറഞ്ഞത് ഇങ്ങനെയാണ് . 2020ൽ സാമ്പത്തികകാര്യ മന്ത്രി ആയപ്പോഴും അദ്ദേഹം ഭഗവത് ഗീതയിൽ തൊട്ടാണ് സത്യവാചകം ചൊല്ലിയത്.
