അടുത്തിടെ പുറത്തു വന്നതിൽ മലയാളി പ്രേക്ഷകർക്ക് ഏറെ പ്രിയപ്പെട്ട ചിത്രമായിരുന്നു രോമാഞ്ചം. ഇപ്പോൾ സിനിമയുടെ പുത്തൻ വിശേഷങ്ങൽ പങ്കുവെച്ച് എത്തിയിരിക്കുകയാണ് ചിത്രത്തിലെ സൗബിന്റെ നായിക ദീപിക ദാസ്. ചിത്രത്തിൽ നഴ്സ് നയന എന്ന കഥാപാത്രമായി എത്തി തിളങ്ങിയിരുന്നു താരം. ഇപ്പോഴിതാ അധികം ആരും ശ്രദ്ധിക്കാത്ത ഒരു രഹസ്യമാണ് താരം പങ്കുവെക്കുന്നത്.
ചിത്രത്തിൽ സൗബിനൊപ്പമുള്ള രസകരമായ വേഷം തന്നെയാണ് ദീപിക അവതരിപ്പിച്ചത്. അതേ രംഗത്തിൽ തന്നെ ഡോക്ടറും ജൂനിയർ ഡോക്ടറും സൗബിന്റെ സുഖവിവരം അന്വേഷിക്കാൻ എത്തുന്നത് കാണാം. നഴ്സ് ആയ നയന എന്ന കഥാപാത്രത്തെ അഭിനയിച്ച ദീപിക ദാസും അതേ രംഗത്തിൽ ജൂനിയർ ഡോക്ടർ ആയി വന്ന ശ്രീനാഥ് എരമവും തമ്മിൽ അധികമാർക്കും അറിയാത്തൊരു ബന്ധമുണ്ട്. സിനിമയിൽ രണ്ട് പേർക്കും തൊഴിലിടത്തിലെ ബന്ധം മാത്രമേ ഉള്ളൂവെങ്കിലും ജീവിതത്തിൽ രണ്ട് പേരും ഭാര്യാ ഭർത്താക്കന്മാർ ആണ്.
‘അങ്ങനെ നയനയും ജൂനിയർ ഡോക്ടറും ഒന്നിക്കുകയാണ് സൂർത്തുക്കളെ, ആ ജൂനിയർ ഡോക്ടർ എന്റെ കെട്ട്യോനാണ്..’ എന്ന കുറിപ്പോടെയാണ് ദീപിക രോമാഞ്ചത്തിന്റെ ലൊക്കേഷനിൽ നിന്നുള്ള ചിത്രങ്ങൾ ഫെയ്സ്ബുക്കിൽ പങ്കുവച്ചിരിക്കുന്നത്. ശ്രീനാഥ് അധ്യാപകനായി ജോലി നോക്കുകയാണ്. ഹ്രസ്വചിത്രങ്ങളിലൂടെയാണ് ദീപിക ശ്രദ്ധ നേടുന്നത്. ഒരു മാദ്ധ്യമ പ്രവർത്തക കൂടിയാണ് നടി. കള്ളിക്കള്ളി മാസ്ക് എന്ന വിഡിയോയിലൂടെ ശ്രദ്ധ നേടിയ ദീപികയെ രോമാഞ്ചത്തിലേക്ക് വിളിച്ചത് നടിയുടെ ക്ലാസ്മേറ്റും ചിത്രത്തിന്റെ അസോഷ്യേറ്റ് ഡയറകടറുമായ ഷിഫ്ന ബബിൻ ആണ്.
Comments