ജപ്പാനിൽ 35-ാം വിവാഹ വാർഷികം ആഘോഷിച്ച് മോഹൻലാലും സുചിത്രയും. അവധിക്കാലം ആഘോഷിക്കാനാണ് കുടുംബസമേതം മോഹൻലാൽ ജപ്പാനിൽ എത്തിയത്. ‘ഫ്രം ടോക്കിയോ വിത്ത് ലൗവ്’ എന്ന ക്യാപ്ഷനോടെയാണ് മോഹൻലാൽ വിവാഹ വാർഷിക ചിത്രം പങ്കുവെച്ചത്. സുചിത്രയ്ക്ക് കേക്ക് നൽകുന്ന ചിത്രമാണ് താരം പങ്കുവെച്ചിരിക്കുന്നത്.
മുപ്പത്തിയഞ്ചുവർഷത്തെ സ്നേഹവും, ആത്മബന്ധവും ആഘോഷിക്കുന്നു എന്നും മോഹൻലാൽ ചിത്രത്തോടൊപ്പം കുറിച്ചു. മോഹൻലാലിന്റെ സുഹൃത്തും നിർമാതാവുമായ ആന്റണി പെരുമ്പാവൂർ ഇരുവർക്കും ആശംസകളുമായി എത്തി. ആയുരാരോഗ്യവും പ്രാർത്ഥനയും നേരുന്നു എന്നായിരുന്നു ആന്റണി പെരുമ്പാവൂരിന്റെ വാക്കുകൾ.
1988 ഏപ്രിൽ 28-നാണ് മോഹൻലാലും സുചിത്രയും വിവാഹിതരായത്. അന്തരിച്ച തമിഴ് നടനും നിർമ്മാതാവുമായ കെ. ബാലാജിയുടെ മകളാണ് സുചിത്ര. കഴിഞ്ഞ ആഴ്ചയായിരുന്നു മോഹൻ ലാൽ കുടുംബ സമേതം അവധിക്കാലം ആഘോഷിക്കാനായി ജപ്പാനിൽ എത്തിയത്.
