ബെംഗളൂരു: കഴിഞ്ഞ വർഷം ഡിസംബറിൽ നടന്ന കാറപകടത്തെ തുടർന്ന് വിശ്രമത്തിലാണ് ഇന്ത്യൻ ക്രിക്കറ്റ് താരം റിഷഭ് പന്ദ്. നിരവധി ശസ്ത്രക്രിയകൾക്ക് വിധേയനായ പന്ദ് തന്റെ ഓരോ വിശേഷങ്ങളും ആരാധകരെ അറിയിക്കാറുണ്ട്. ഇപ്പോഴിതാ ഐപിഎല്ലിന്റെ പതിനാറാം സീസൺ പുരോഗമിക്കുന്നതിനിടെ ആരാധകർക്ക് വേണ്ടിയുള്ള പുതിയ വീഡിയോയുമായി എത്തിയിരിക്കുകയാണ് താരം.
വാക്കിംഗ് സ്റ്റിക്കിന്റെ സഹായമില്ലാതെ റിഷഭ് നടക്കുന്ന വീഡിയോയാണ് പങ്കുവെച്ചിരിക്കുന്നത്. ഇതിനൊപ്പം തന്നെ
ടേബിൾ ടെന്നീസ് കളിക്കുന്ന വീഡിയോയും അദ്ദേഹം പങ്കുവെച്ചിട്ടുണ്ട്. ഇരട്ടി ആവേശത്തോടെയാണ് ആരാധകർ വീഡിയോ ഏറ്റെടുത്തിരിക്കുന്നത്. കാൽമുട്ടിൽ നടത്തിയ ശസ്ത്രക്രിയക്ക് ശേഷം നിലവിൽ ബെംഗളൂരുവിലെ ദേശീയ ക്രിക്കറ്റ് അക്കാഡമിയിൽ തുടർ ചികിത്സകളിലും പരിശീലനത്തിലുമാണ് റിഷഭ് പന്ത്.
ഡൽഹി ക്യാപിറ്റൽസിന്റെ താരമായ റിഷഭ് പന്ദ് ഐപിഎൽ പതിനാറാം സീസണും കളിക്കില്ലെന്ന് നേരത്തെ അറിയിച്ചിരുന്നു. അപകടത്തിന് ശേഷം കാൽമുട്ടിലെ ശസ്ത്രക്രിയകൾക്ക് വിധേയനായ താരം വീട്ടിൽ ഫിസിയോതെറാപ്പി ഉൾപ്പടെയുള്ള തുടർ ചികിത്സകൾക്ക് വിധേയനായിരുന്നു. ഇതിന് ശേഷമാണ് റിഷഭ് എൻസിഎയിലേക്ക് എത്തിയത്. അമ്മയെ കാണാൻ ഡൽഹിയിൽ നിന്ന് റൂർക്കിയിലേക്കുള്ള യാത്രയ്ക്കിടെയാണ് പന്ദിന് അപകടം സംഭവിച്ചത്.
