മലർവാടി ആർട്‌സ് ക്ലബ്ബ് എന്ന ചിത്രത്തിലൂടെ മലയാളികൾക്ക് സുപരിചിതയായ അപൂർവ ബോസ് വിവാഹിതയായി. ദീർഘകാല സുഹൃത്തായ ധിമൻ തലപത്രയാണ് വരൻ. രജിസ്റ്റർ വിവാഹമായിരുന്നു. ചടങ്ങിന്റെ ദൃശ്യങ്ങൾ ഇൻസ്റ്റഗ്രാമിൽ പങ്കുവെച്ചുകൊണ്ട് അപൂർവ തന്നെയാണ് വിവാഹവിവരം ആരാധകരെ അറിയിച്ചത്.
‘നിയമപരമായി രണ്ട് പേരും പരസ്പരം കുടുങ്ങി’ എന്ന അടിക്കുറിപ്പോടെയാണ് ചിത്രങ്ങൾ സമൂഹമാദ്ധ്യമങ്ങളിൽ പങ്കുവെച്ചത്. കഴിഞ്ഞ വർഷം ജൂലൈയിലായിരുന്നു ഇരുവരുടെയും വിവാഹ നിശ്ചയം. നവംബറിൽ കുടുംബാംഗങ്ങൾക്കൊപ്പം വിവാഹാഘോഷം നടത്താനാണ് ഇരുവരുടെയും പദ്ധതി.
ഏറെ ലളിതമായ രീതിയിലായിരുന്നു വിവാഹചടങ്ങുകൾ. അടുത്ത ബന്ധുക്കൾ മാത്രം പങ്കെടുത്ത ചടങ്ങിൽ പതിവ് വിവാഹ രീതികൾ ഉണ്ടായിരുന്നില്ല. അപൂർവയുടെ അടുത്ത സുഹൃത്താണ് ധിമൻ. സ്വിറ്റ്സർലൻഡിലെ ജനീവയിലാണ് അപൂർവ ഇപ്പോൾ താമസിക്കുന്നത്. ജനീവയിൽ യൂണൈറ്റഡ് നേഷൻസ് എൻവിയോൺമെന്റ് പ്രോഗ്രാം കമ്മ്യൂണിക്കേഷൻ കൺസൾട്ടന്റായി ജോലി ചെയ്യുകയാണ് അപൂർവ ഇപ്പോൾ.
2010-ൽ വിനീത് ശ്രീനിവാസൻ സംവിധാനം ചെയ്ത ചിത്രമായിരുന്നു മലർവാടി ആർട്‌സ് ക്ലബ്ബ്. നിവിൻ പോളി, ഭഗത് ബേബി മാനുവൽ, അജു വർഗീസ് തുടങ്ങി വൻ താരനിര അണിനിരന്ന ചിത്രത്തിലൂടെയായിരുന്നു അപൂർവ ബോസിന്റെ അരങ്ങേറ്റം. സിനിമയിൽ രേവതി എന്ന കഥാപാത്രത്തെ അവതരിപ്പിച്ച് പ്രേക്ഷകരിൽ നിന്ന് വളരെയധികം അംഗീകാരം നേടാനും അപൂർവയ്‌ക്കായി. പിന്നീട് പ്രണയം, പത്മശ്രീ ഭരത് ഡോ. സരോജ് കുമാർ, പൈസ, പൈസ. പകിട തുടങ്ങി നിരവധി ചിത്രത്തിൽ അഭിനയിച്ചു.
