അഹമ്മദബാദ്: ഗുജറാത്തിൽ രണ്ടാമത്തെ പ്ലാന്റ് സ്ഥാപിക്കാനൊരുങ്ങി എംജി മോട്ടോർ. ഇന്ത്യയിൽ പ്രവർത്തനം വിപുലീകരിക്കുന്നതിന്റെ ഭാഗമായാണ് ഗുജറാത്തിൽ പ്ലാന്റ് സ്ഥാപിക്കുന്നത്. 2028 ഓടെ 5,000 കോടി രൂപയുടെ നിക്ഷേപവും 20,000 പേർക്ക് തൊഴിലും നൽകാനുള്ള പദ്ധതിക്കാണ് കമ്പനി രൂപം കൊടുത്തിരിക്കുന്നത്.
നിലവിൽ എംജി മോട്ടറിന്റെ ഒരു പ്ലാന്റ് ഗുജറാത്തിലെ വഡോദരയിൽ പ്രവർത്തിക്കുന്നുണ്ട്. ഇവിടെ നിന്നും 1,20000 കാറുകളാണ് ഉത്പാദിപ്പിക്കുന്നത്. പുതിയ പ്ലാന്റ് നിലവിൽ വരുന്നതോടെ ഉത്പ്പാദന ശേഷി മൂന്ന് ലക്ഷം യൂണിറ്റായി ഉയർത്താനും കമ്പനി ലക്ഷ്യമിടുന്നുണ്ട്. 2028 ഓടെ ഇന്ത്യയിൽ നാല് മുതൽ അഞ്ച് വരെ പുതിയ മോഡലുകൾ കൊണ്ടുവരുമെന്നും അവയിൽ മിക്കതും ഇലക്ട്രിക് വാഹനങ്ങളായിരിക്കുമെന്നും കമ്പനി സ്ഥിരീകരിച്ചു. അടുത്ത അഞ്ച് വർഷത്തിനുള്ളിൽ മൊത്തം വിൽപ്പനയുടെ 65 മുതൽ 75 ശതമാനം വരെ ഇവികൾ കൈവരിക്കുമെന്ന് എംജി മോട്ടോഴ്സ് പ്രതീക്ഷിക്കുന്നു.
ഗുജറാത്തിൽ സജ്ജീകരിക്കുന്ന നിർമ്മാണ യൂണിറ്റിൽ ഇലക്ട്രിക് വാഹന ഘടകങ്ങളുടെ നിർമ്മാണം, ബാറ്ററി അസംബ്ലി എന്നിവയാണ് പ്രധാനമായി നടക്കുക. സീറോ എമിഷൻ വാഹനങ്ങളുടെ വിപുലമായ ശ്രേണി ഇന്ത്യയിൽ അവതരിപ്പിക്കാനും എംജി മോട്ടോർ ലക്ഷ്യമിടുന്നു.
Comments