ഇന്ന് കേരള സമൂഹം നേരിടുന്ന ഏറ്റവും വലിയ വെല്ലുവിളിയാണ് യുവാക്കൾക്കിടയിലെ ലഹരി ഉപയോഗം. വിദ്യാലയങ്ങളിൽ, തൊഴിലിടങ്ങളിൽ എന്നുവേണ്ട, എല്ലാ മേഖലയിലേക്കും ഈ വിപത്ത് ചിറക് വിരിച്ചിരിക്കുന്നു. ലഹരിമരുന്ന് പിടികൂടി എന്ന വാർത്തയില്ലാത്ത ദിനങ്ങൾ ഇല്ലെന്നതാണ് യാഥാർത്ഥ്യം. ആദ്യം സ്വഭാവ വ്യത്യാസവും ശേഷം മാനസിക വിഭ്രാന്തിയിലേക്ക് വരെ യുവാക്കളെ കൊണ്ടെത്തിക്കുന്ന വലിയൊരു കെണിയാണ് മയക്കുമരുന്ന്.
ലഹരി വസ്തുക്കൾ ഏറ്റവും കൂടുതൽ ബാധിക്കുന്നത് തലച്ചോറിനെയാണ്. കൃത്യമായ ചികിത്സ ലഭ്യമായില്ല എങ്കിൽ ഈ രോഗം തലച്ചോറിനെ പ്രതികൂലമായി ബാധിക്കും. കൊക്കെയിൻ. എൽസിഡി, കന്നാഹിസ്, ആംഫെറ്റാമൈൻ എന്നിവയാണ് കേരളത്തിൽ മുഖ്യമായും കാണുന്ന ലഹരി പദാർത്ഥങ്ങൾ. ഏതൊരു ലഹരി പദാർത്ഥവും തലച്ചോറിനെ ബാധിക്കുന്നുണ്ട്. ലഹരിയുടെ വകഭേദങ്ങൾക്കനുസരിച്ച് തലച്ചോറിനെ ബാധിക്കുന്ന രീതിയിൽ വ്യത്യാസം വരാം. അതിസങ്കീർണമായ ഘടനയാണ് തലച്ചോറിനുള്ളത്. ഈ ഘടനയിലേക്ക് ലഹരി പദാർത്ഥങ്ങൾ എത്തിച്ചേരുമ്പോൾ റിഫ്ലക്സ് പ്രവർത്തങ്ങൾ താറുമാറാകുന്നു. തുടർന്ന് ഓർമ്മക്കുറവ്, ഉത്കണ്ഠ, തുടങ്ങിയ മാനസിക സംഘർഷങ്ങൾ മുതൽ മസ്തിഷ്ക ആഘാതം വരെ സംഭവിക്കാൻ സാധ്യതയുണ്ട്.
ഇത്തരക്കാരിൽ പ്രധാനമായും ഏത് സമയവും മയക്കം, വൃത്തിക്കുറവ്, ദിനചര്യകളിൽ മാറ്റം, സൗഹൃദങ്ങളിൽ മാറ്റം, പണം ധാരാളമായി ആവശ്യപ്പെടുക, വിറയൽ, സംസാരത്തിൽ വൈകല്യം, ഉറക്കകുറവ്, പതിവിലും കൂടുതൽ ഉറങ്ങുക, ചുറ്റുമുള്ളവരെ കുറിച്ച് കൃത്യമായ ബോധമില്ലായ്മ എന്നീ ലക്ഷണങ്ങളാണ് പ്രധാനമായും കണ്ടുവരുന്നത്.
അമിതമായ ലഹരി ഉപയോഗത്തെ വിവിധ രീതിയിൽ നിയന്ത്രിക്കാവുന്നതാണ്. കൗൺസിലിംഗും ബിഹേവിയറൽ തെറാപ്പിയും ഇത്തരകാർക്ക് ഉത്തമമാണ് . ഇതിനോടൊപ്പം മരുന്നുകളും ഉപയോഗിച്ച് ചികിത്സ നടത്താൻ കഴിയും. കൂടാതെ, ജീവിതത്തിനെ ആനന്ദകരമാക്കുക, മാനസിക പ്രശ്നങ്ങൾക്ക് സഹായം തേടുക, വിനോദത്തിലേർപ്പെടുക എന്നിവയൊക്കെ ചെയ്താൽ കുറച്ച് വൈകിയായാലും ലഹരി ഉപയോഗത്തിൽ നിന്നും മുക്തരാകാൻ സാധിക്കുമെന്നാണ് പഠനങ്ങൾ തെളിയിക്കുന്നത്.
Comments