നിവിൻ പോളി – ജൂഡ് ആന്തണി കൂട്ടുകെട്ട് ആരാധകർക്ക് ഏറെ ഇഷ്ടമാണ്. ‘ഓം ശാന്തി ഓശാന’ ആയിരുന്നു ഇരുവരുടെയും ഹിറ്റ് ചിത്രം. ഒരിടവേളയ്ക്ക് ശേഷം ഇരുവരും ഒരുമിക്കുന്നു എന്ന വാർത്ത നിവിൻ പോളിയാണ് പുറത്തുവിട്ടത്. വാർത്ത പുറത്തുവന്നത് മുതൽ ആരാധകർ ആവേശത്തിലായിരിക്കുകയാണ്. ഇപ്പോഴിതാ ചിത്രത്തെ കുറിച്ച് പുതിയ വാർത്തകൾ പുറത്തു വന്നിരിക്കുകയാണ്. ഒരു അഭിമുഖത്തിൽ സംവിധായകൻ ജൂഡ് ആന്തണി തന്നെയാണ് ചിത്രത്തിന്റെ പുതിയ വിശേഷങ്ങൾ പങ്കുവെച്ചത്.
ഇരുവരും ഒന്നിക്കുന്ന ചിത്രത്തിൽ തെന്നിന്ത്യൻ താരസുന്ദരി രശ്മിക മന്ദാന നായികയായേക്കും. കൂടാതെ ചിത്രത്തിൽ വിജയ് സേതുപതിയേയും ഭാഗമാക്കാൻ താല്പര്യമുണ്ടെന്നും ഇതിന്റെ ചർച്ചകൾ നടക്കുക ആണെന്നും ജൂഡ് പറഞ്ഞു. പല താരങ്ങളുമായി ഞാൻ സംസാരിച്ചു. എന്നാൽ തങ്ങളുടെ അടുത്ത ചിത്രമേതാണെന്ന് അവരാണ് തീരുമാനിക്കേണ്ടത്. ഇപ്പോൾ നിവിനോട് സിനിമയെപ്പറ്റി സംസാരിക്കുന്നുണ്ട്. വിജയ് സേതുപതിയെയും രശ്മികയെയും ഈ സിനിമയുടെ ഭാഗമാക്കാൻ താല്പര്യമുണ്ട്. എനിക്ക് രശ്മികയെ വളരെ ഇഷ്ടമാണ്, അവരുടെ അഭിനയവും. നിലവിൽ ചർച്ചയിലുള്ള വിഷയമാണ്, എന്നായിരുന്നു ജൂഡിന്റെ വാക്കുകൾ.
ജൂഡിന്റെ പുതിയ ചിത്രമായ 2018 സിനിമയുമായി ബന്ധപ്പെട്ട പ്രമോഷൻ പരിപാടിയിലായിരുന്നു അദ്ദേഹം ഇക്കാര്യം പറഞ്ഞത്. നിവിനുമായുള്ള പുതിയ സിനിമ ഒരു ഫാമിലി എന്റർടെയ്നറായിരിക്കുമെന്നും വിജയ് സേതുപതിയെ അഭിനയിപ്പിക്കാൻ ആഗ്രഹിക്കുന്നുവെന്നും ജൂഡ് പറഞ്ഞിരുന്നു. ഇതിന് പിന്നാലെയാണ് ഇക്കാര്യം സ്ഥിരീകരിച്ച് നിവിൻ രംഗത്തെത്തിയത്. വീണ്ടും ഒന്നിച്ച്, ഇത്തവണ ഒരൊന്നൊന്നര പൊളി’, എന്നാണ് ജൂഡിനൊപ്പമുള്ള ഫോട്ടോ പങ്കുവച്ച് നിവിൻ കുറിച്ചത്.
