ബെംഗളുരു: വിമാനയാത്രക്കിടെ ബീഡി വലിച്ച രാജസ്ഥാൻ സ്വദേശി അറസ്റ്റിൽ. 56-കാരനായ എം പ്രവീൺ കുമാറാണ് അറസ്റ്റിലായത്. അഹമ്മദാബാദിൽ നിന്നും ബെംഗളൂരുവിലേക്ക് പോകുന്ന അകാശ എയറിന്‍റെ വിമാനത്തിനുള്ളിലാണ് പ്രവീൺ കുമാർ ബീഡി വലിച്ചത്. ഇയാളുടെ ആദ്യ വിമാനയാത്ര കൂടിയായിരുന്നു ഇത്. രാജസ്ഥാനിലെ പാലി ജില്ലയിലെ മാര്‍വാര്‍ സ്വദേശിയാണ് പ്രവീണ്‍കുമാര്‍.
എസ്എൻവി ഏവിയേഷൻ പ്രൈവറ്റ് ലിമിറ്റഡിലെ ഡ്യൂട്ടി മാനേജരായ വിജയ് തുള്ളൂരിന്റെ പരാതിയിലാണ് പ്രവീണിനെ പോലീസ് അറസ്റ്റു ചെയ്തത്. ബെംഗളുരു വിമാനത്താവളത്തില്‍ ആദ്യമായാണ് വിമാനത്തിൽ ബീഡി വലിച്ചതിന് ഒരാൾ അറസ്റ്റിലാവുന്നത്. നിര്‍മ്മാണ മേഖലയിൽ ജോലി ചെയ്യുന്ന പ്രവീൺകുമാർ ആദ്യമായാണ് വിമാന യാത്ര നടത്തുന്നത്. നിയമങ്ങളേക്കുറിച്ച് ധാരണ ഇല്ലാത്തതിനാലാണ് ശുചിമുറിയിൽ കയറി ബീഡി വലിച്ചതെന്ന് ഇയാൾ പറഞ്ഞു.
ട്രെയിനിലെ ശുചിമുറികളില്‍ പൊലീസുകാര്‍ അടക്കമുള്ളവര്‍ പുകവലിക്കുന്നത് കണ്ടിട്ടുണ്ടെന്നും അതിനാൽ വിമാനത്തിലും പുകവലിക്കാമെന്ന് കരുതി എന്നും പ്രവീണ്‍ പറഞ്ഞു. അതേസമയം, സുരക്ഷാ പരിശോധനയില്‍ ബീഡി കണ്ടെത്താത്തത് ഗുരുതരമായ വീഴ്ചയാണ് എന്നാണ് മുതിര്‍ന്ന പോലീസ് ഉദ്യോഗസ്ഥര്‍ വിശദമാക്കുന്നത്.
