2000 ത്തിൽ പുറത്തിറങ്ങിയ ‘പ്രിയം’ എന്ന കുഞ്ചാക്കോ ബോബൻ ചിത്രത്തിലൂടെ അഭിനയരംഗത്തേക്ക് കടന്നുവന്ന് പിന്നീട് സിനിമാരംഗത്തുനിന്നും അപ്രത്യക്ഷയായ താരമാണ് ദീപ നായർ. പ്രിയം സിനിമ കണ്ടവർ ഒരിക്കലും ആനിയായെത്തിയ ദീപാ നായരെ മറക്കാൻ ഇടയില്ല. ഈ ഒരൊറ്റ ചിത്രത്തിലൂടെ നടി നിരവധി ആരാധകരെയാണ് സ്വന്തമാക്കിയത്. ഇപ്പോഴും ആരാധകർ ഏറെയാണ്. തിരുവനന്തപുരം സ്വദേശിനിയായ ദീപ എഞ്ചിനീയറിങ്ങിന് പഠിച്ചു കൊണ്ടിരിക്കുന്നതിനിടയിലാണ് പ്രിയം സിനിമയിൽ അഭിനയിച്ചത്. തന്റെ പഠനം പൂർത്തിയാക്കാനാണ് സിനിമയിൽ നിന്ന് ബ്രേക്ക് എടുത്തത്. എന്നാൽ അത് സിനിമയിൽ നിന്ന് തീർത്തും വിട്ടു നിൽക്കലായി.
സമൂഹമാദ്ധ്യമങ്ങളിൽ ഏറെ സജീവമായ താരം ഭർത്താവിന്റെയും മക്കളുടെയും വിശേഷങ്ങളും ചിത്രങ്ങളും ഇടയ്ക്കിടെ പങ്കുവയ്ക്കാറുണ്ട്. ഇപ്പോഴിതാ ഇക്കഴിഞ്ഞ മാതൃദിനത്തിൽ ദീപ തന്റെ രണ്ടു മക്കൾ ചേർന്നൊരുക്കിയ സർപ്രൈസിനെക്കുറിച്ച് പങ്കുവച്ച കുറിപ്പും ചിത്രങ്ങളുമാണ് ശ്രദ്ധേയമാകുന്നത്. മക്കളായ ശ്രദ്ധയും മാധവിയും ചേർന്നാണ് അച്ഛൻ രാജീവിന്റെ സഹായത്തോടെ അമ്മ ദീപയ്ക്കായി സർപ്രൈസ് ഒരുക്കിയത്. വിവിധതരത്തിലുള്ള ഭക്ഷണ വിഭവങ്ങൾ ഒരുക്കി അതിൽ ‘അമ്മ’ എന്നെഴുതിയാണ് ശ്രദ്ധയും മാധവിയും ദീപയെ ഞെട്ടിച്ചത്. ഏറെ പ്രയത്നിച്ചാണ് ഇവർ ഇതെല്ലാം ഒരുക്കിയതെന്നും ലോകത്തിലെ എല്ലാ അമ്മമാർക്കും മാതൃദിനാശംസകൾ അറിയിക്കുന്നുവെന്നും ദീപ ഇൻസ്റ്റഗ്രാം കുറിപ്പിലൂടെ പറഞ്ഞു.
അതേസമയം താരം ഭർത്താവിനും രണ്ട് മക്കൾക്കും ഒപ്പം ഓസ്ട്രേലിയയിലെ മെൽബണിലാണിപ്പോൾ. സോഫ്റ്റ് വെയർ എഞ്ചിനിയറായ ദീപയ്ക്ക് പഠനം പൂർത്തിയാക്കും മുൻപേ ഇൻഫോസിസിൽ ജോലിയും കിട്ടിയിരുന്നു. ചക്രം, ദേവദൂതൻ തുടങ്ങിയ സിനിമകളിലെ നായികാ വേഷത്തിന് ദീപയെ പരിഗണിച്ചതായിരുന്നു. എന്നാൽ കരിയറും ജീവിതവും ഒരുമിച്ചു കൊണ്ടുപോകാൻ കഴിയാത്തതിനാൽ താരം സിനിമകൾ ഒഴിവാക്കുകയായിരുന്നു. ഇടവേള എടുത്ത താരത്തിന് പിന്നീട് സിനിമയിലേക്ക് തിരിച്ചു വരാനും കഴിഞ്ഞില്ല.
