കാൻ ചലച്ചിത്രമേളയിൽ കാഞ്ചീവരം സാരിയിൽ സുന്ദരിയായി ഖുശ്ബു സുന്ദർ. മണിപ്പൂരി ചിത്രമായ ‘ഇഷ്നോ’വിന്റെ പ്രദർശനത്തിനോട് അനുബന്ധിച്ചാണ് ഖുശ്ബു കാഞ്ചീപുരം സാരി ധരിച്ച് റെഡ് കാർപ്പറ്റിലെത്തിയത്. കാഞ്ചിപുരം സാരിക്കൊപ്പം പരമ്പരാഗത ആഭരണങ്ങളും സിന്ദൂരവും അണിഞ്ഞാണ് താരം എത്തിയത്. സാരിയുടെ വിവരങ്ങൾ ആരാധകരുമായി പങ്കുവച്ച ഖുശ്ബു ചലച്ചിത്ര മേളയിൽ പങ്കെടുക്കാനായതിൽ അഭിമാനം തോന്നുന്നുവെന്നും കുറിച്ചു.
നമ്മുടെ രാജ്യത്തിന്റെ മനോഹരമായ സംസ്‌കാരത്തെയും പാരമ്പര്യത്തെയും അഭിമാനത്തോടെ മുന്നോട്ട്കൊണ്ടു പോകുന്നുവെന്ന് ഖുശ്ബു കുറിച്ചു. ‘തെന്നിന്ത്യയിലെ പരമ്പരാഗത കാഞ്ചീവരം സാരി ധരിച്ച് കാനിലെ റെഡ്കാർപ്പറ്റിൽ. കൈത്തറിയിൽ നെയ്തെടുത്ത ഓരോ സാരിയും നമ്മുടെ നെയ്‌ത്തുകാരുടെ പാരമ്പര്യത്തെ ജീവനോടെ നിലനിർത്തുന്നു.’ കാനിൽ ഡെലിഗേറ്റായി പങ്കെടുക്കാൻ സാധിച്ചതിൽ അഭിമാനമുണ്ടെന്നും ഖുശ്ബു എഴുതി.
കാനിൽ ഒട്ടേറെ ഇന്ത്യൻ സിനിമയെ പ്രതിനിധീകരിച്ച് ഒട്ടേറെ താരങ്ങളാണ് പങ്കെടുക്കുന്നത്. ഐശ്വര്യ റായ് ബച്ചൻ, വിജയ് വർമ, മാനുഷി ചില്ലാർ, മൃണാൽ താക്കൂർ, ഉർവശി റൗട്ടേല, സാറാ അലി ഖാൻ തുടങ്ങിയവരും റെഡ് കാർപ്പറ്റിലെത്തിയിരുന്നു.
