മുംബൈ: ടെലിവിഷന്‍ താരം വൈഭവി ഉപാധ്യായ (34) കാറപകടത്തില്‍ മരിച്ചു. സാരാഭായി വേഴ്സസ് സാരാഭായ്’ എന്ന ജനപ്രിയ ടിവി ഷോയിലൂടെ ശ്രദ്ധിക്കപ്പെട്ട നടിയാണ് വൈഭവി. നിര്‍മ്മാതാവും നടനുമായ ജെ.ഡി മജീതിയയാണ് നടിയുടെ വിയോഗ വാര്‍ത്ത പുറത്തുവിട്ടത്. താരത്തിന്റെ വിയോഗം അവിശ്വസനീയവും ദുഃഖകരവും ഞെട്ടിപ്പിക്കുന്നതുമാണെന്ന് മജീതിയ പറഞ്ഞു.
ചൊവ്വാഴ്ച പുലര്‍ച്ചെ ഹിമാചല്‍ പ്രദേശില്‍ വച്ചാണ് അപകടമുണ്ടായത്. വളവ് തിരിയുന്നതിനിടയില്‍ നിയന്ത്രണം നഷ്ടപ്പെട്ട് നടി സഞ്ചരിച്ചിരുന്ന കാര്‍ കൊക്കയിലേക്ക് മറിയുകയായിരുന്നു. നടിയ്‌ക്കൊപ്പം പ്രതിശ്രുത വരനും കാറിൽ ഉണ്ടായിരുന്നതായാണ് പുറത്തു വരുന്ന റിപ്പോര്‍ട്ടുകള്‍.
ഹിമാചലില്‍ നിന്ന് വൈഭവിയുടെ ഭൗതിക ശരീരം മുംബൈയിലേക്ക് കൊണ്ടുവരും. പൊതുദര്‍ശനത്തിന് ശേഷമാകും സംസ്‌കാര ചടങ്ങുകള്‍. 2020-ൽ പുറത്തിറങ്ങിയ ‘ഛപാക്’ എന്നീ സിനിമയിൽ ദീപിക പദുക്കോണിനൊപ്പം അഭിനയിച്ചിട്ടുണ്ട്. ‘തിമിർ’ (2023) എന്നീ ചിത്രത്തിലും വൈഭവി അഭിനയിച്ചിട്ടുണ്ട്. സിഐഡി, അദാലത്ത് തുടങ്ങിയവയാണ് വൈഭവിയുടെ മറ്റ് ജനപ്രിയ ടിവി ഷോകൾ.
