മുപ്പത്തിമൂന്നോളം സംഗീതജ്ഞരെ ഒന്നിച്ചു ചേർത്ത് മൂകാംബികാദേവിയെക്കുറിച്ച് പുറത്തിറക്കിയ സംഗീതനൃത്ത ആവിഷ്കാരം ‘ഗാനാമൃതവർഷിണി’ യുട്യൂബിൽ വളരെ ശ്രദ്ധ നേടുന്നു. രഞ്ജിത്ത് മേലേപ്പാട്ടിന്റെ സംഗീതസംവിധാനത്തിൽ റിഥം ലാബ്സ് പ്രൊഡക്ഷൻസിന്റെ ബാനറിലാണ് ഗാനം ഒരുങ്ങിയിരിക്കുന്നത്. സിത്താര കൃഷ്ണകുമാർ ആണ് ഗാനം ആലപിച്ചു നൃത്തം ചെയ്തിരിക്കുന്നത്. സംസ്ഥാന അവാർഡ് ജേതാവ് ബിജു ധ്വനിതരംഗ് ആണ് കൊറിയോഗ്രാഫി നിർവഹിച്ചിരിക്കുന്നത്.
ക്യാമറ ചലിപ്പിച്ചത് സിനിമാ പിന്നണിയിൽ പ്രവർത്തിക്കുന്ന അരുൺ ഭാസ്കർ. പ്രശസ്ത സാരംഗി വാദകനായ മോമീൻ ഖാൻ, യുട്യൂബ് താരമായ മഹേഷ് രാഘവൻ, പണ്ഡിറ്റ് രാജീവ് ജനാർദ്ദനൻ(സിത്താർ), പോളി വർഗീസ്, എബി സാൽവിൻ തോമസ്, അശ്വിൻ ശിവദാസ്, രൂപരേവതി തുടങ്ങി മുപ്പത്തിമൂന്ന് പ്രഗത്ഭരായ സംഗീതജ്ഞരെ കോർത്തിണക്കിക്കൊണ്ടാണ് ശ്രീ രഞ്ജിത്ത് മേലേപ്പാട്ട് ഈ സംഗീതശില്പത്തിന് നേതൃത്വം കൊടുത്തിരിക്കുന്നത്.
