ഇന്ത്യൻ ക്രിക്കറ്റിലെ പുതിയ താരോദയങ്ങൾക്ക് സാക്ഷ്യം വഹിച്ച ഐപിഎൽ സീസണായിരുന്നു 2023-ലേത്. ശുഭ്മാൻ ഗിൽ, സായ് ദർശൻ, ആകാശ് മധ്വാൾ തുടങ്ങി നിരവധി താരങ്ങളുടെ മികവ് ഈ സീസണിൽ കാണാൻ സാധിച്ചു. എന്നാൽ പഴയ താരങ്ങളുടെ തിരിച്ചു വരവുകൾക്ക് കൂടി ഈ സീസൺ സാക്ഷ്യം വഹിച്ചു. ലേലത്തിൽ ആവശ്യക്കാരുണ്ടാവാതിരുന്ന നിരവധി സീനിയർ താരങ്ങൾ അപ്രതീക്ഷിത തിരിച്ചുവരവാണ് 2023 ഐപിഎലിൽ നടത്തിയത്. അത്തരത്തിൽ പ്രേക്ഷകരെ ഞെട്ടിച്ച ചില താരങ്ങൾ ഇവരാണ്.
മോഹിത് ശർമ
ഗുജറാത്തിന്റെ പേസർ നിരയിലെ മിന്നും താരമാണ് മോഹിത് ശർമ. അവസാന സീസണിൽ നെറ്റ് ബൗളറായ മോഹിതിന് ഇപ്രാവിശ്യം അവസരം നൽകുകയായിരുന്നു. 13 മത്സരങ്ങളിൽ നിന്ന് 23 വിക്കറ്റാണ് താരം നേടിയത്. ഈ സീസണിൽ അഞ്ച് വിക്കറ്റ് നേട്ടവും തന്റെ പേരിലാക്കി മോഹിത് അതിഗംഭീര തിരിച്ചുവരവാണ് നടത്തിയത്.
പിയൂഷ് ചൗള
മുംബൈ സ്പിന്നർ പിയൂഷ് ചൗളയുടെ പ്രകടനവും ക്രിക്കറ്റ് ആരാധകരെ ആവേശത്തിലാഴ്ത്തിയിരുന്നു. ഇത് പിയൂഷിന്റെ സീസണാണ് എന്നായിരുന്നു പലരും വിലയിരുത്തിയത്.16 മത്സരങ്ങളിൽ നിന്ന് 22 വിക്കറ്റാണ് താരത്തിന്റെ സംഭാവന.
അജിങ്ക്യ രഹാനെ
മുൻ രാജസ്ഥാൻ നായകനായ രഹാനെയുടെ ക്രിക്കറ്റ് ജീവിതം അവസാനിച്ചെന്ന വിലയിരുത്തലായിരുന്നു ആരാധകർ നൽകിയത്. എന്നാൽ, നിലവിലെ സീസൺ രഹാനെയുടേത് കൂടിയാണ്. ചെന്നൈയുടെ പ്രധാന ബാറ്റർമാരിൽ ഒരാളായി പ്രകടനംകാഴ്ച വെച്ചിരുന്നു. മെല്ലേപോക്കാണ് രഹാനയുടെ ബാറ്റിങ് എന്ന് വിമർശിച്ചവർക്ക് ബാറ്റ് കൊണ്ട് മറുപടി കൊടുക്കാനും രഹാനയ്ക്കായി. 13 മത്സരങ്ങളിൽ നിന്ന് 299 റൺസാണ് രഹാന അടിച്ചെടുത്തത്. 166ന് മുകളിലാണ് സ്ട്രൈക്ക് റേറ്റ്.
സന്ദീപ് ശർമ
ഡിസംബറിൽ നടന്ന ലേലത്തിൽ സന്ദീപിനെ ആരും ശ്രദ്ധിച്ചിരുന്നില്ല. എന്നാൽ ഫാസ്റ്റ് ബൗളർ പ്രസിദ് കൃഷ്ണ പരിക്ക് കാരണം പുറത്തായപ്പോൾ അടിസ്ഥാന വിലയായ 50 ലക്ഷം രൂപയ്ക്കാണ് രാജസ്ഥാൻ റോയൽസ് താരത്തെ സ്വന്തമാക്കിയത്. രാജസ്ഥാന്റെ ആ തീരുമാനം ശരിയായിരുന്നു എന്ന തരത്തിൽ മികച്ച രീതിയിലാണ് സന്ദീപ് ഇപ്രാവശ്യം പന്തെറിഞ്ഞത്. ഈ സീസണിൽ 12 കളിയിൽ നിന്നായി 10 വിക്കറ്റാണ് താരം നേടിയത്. ചെന്നൈക്കെതിരായ മത്സരത്തിൽ താരത്തിന്റെ പ്രകടനവും കയ്യടി നേടി.
Comments