മോദി കരുത്തിൽ പ്രതിരോധ മേഖല ശക്തം; സർജിക്കൽ സ്‌ട്രൈക്ക് മുതൽ ഓപ്പറേഷൻ ഗംഗ വരെ; ഭീകരരുടെ വേരറുത്ത വ്യോമാക്രമണം; വിശ്വം കീഴടക്കാൻ ഐഎൻഎസ് വിക്രാന്ത്; ഇത് പുതിയ ഇന്ത്യ

ഇന്ത്യയുടെ സർവ്വമേഖലകളിലും കരുത്ത് പകർന്നുകൊണ്ട് മോദി സർക്കാർ ഒമ്പത് വർഷം പൂർത്തിയാക്കിയിരിക്കുകയാണ്. ജനക്ഷേമ പദ്ധതികൾക്കും വികസന പ്രവർത്തനങ്ങൾക്കും പുറമെ ഇന്ത്യയ്‌ക്ക് സുരക്ഷിതമായ അതിർത്തികളും ലോകോത്തര അടിസ്ഥാന സൗകര്യങ്ങളും മോദി സർക്കാർ സമ്മാനിച്ചു. ജമ്മു കശ്മീരിലും വടക്കുകിഴക്കൻ സംസ്ഥാനങ്ങളിലെ നക്‌സൽ ബാധിത പ്രദേശങ്ങളിലും ഭീകരതയെയും തീവ്രവാദത്തെയും നിയന്ത്രിച്ച് സമാധാനം പുനഃസ്ഥാപിക്കാനും സർക്കാരിന് സാധിച്ചു. പ്രതിരോധ മേഖലയിൽ വിപ്ലവാത്മകരമായ മാറ്റങ്ങളാണ് ഒമ്പത് വർഷത്തിനിടെ സംഭവിച്ചത്. സായുധ സേനയുടെ ആധുനികവൽക്കരണത്തിന് മാത്രമല്ല ആധുനിക ആയുധങ്ങൾ, പുനർനിർമ്മാണം, സേനയ്‌ക്കുണ്ടായ പോരാട്ട വീര്യം എന്നിവയിലെല്ലാം നരേന്ദ്രമോദി എന്ന ശക്തനായ പ്രധാനമന്ത്രിയുടെ കരുത്തും കരുതലും കാണാം. മോദി സർക്കാരിന്റെ ഒമ്പത് വർഷത്തിനിടെ പ്രതിരോധ മേഖലയിൽ ഏറെ ശ്രദ്ധിക്കപ്പെട്ട, ചർച്ച ചെയ്യപ്പെട്ട സംഭവ വികാസങ്ങൾ‌ പരിശോധിക്കാം.

സർജിക്കൽ സ്‌ട്രൈക്ക്: ഉറി ആക്രമണത്തിന് പിന്നാലെ പാക് അധീന കശ്മീരിൽ ഇന്ത്യൻ സൈന്യം സർജിക്കൽ സ്‌ട്രൈക്ക് നടത്തി. 2016 സെപ്റ്റംബർ 28-29 തീയതികളിൽ നടന്ന ഈ ഓപ്പറേഷൻ ലോകമെമ്പാടും ഇന്ത്യൻ സായുധ സേനയുടെ പ്രതിച്ഛായ തന്നെ മാറ്റിമറിച്ചു. ഭീകരതയോട് ഒരു ശതമാനം പോലും വിട്ടു വീഴ്ചയില്ല എന്ന ശക്തമായ സന്ദേശം ഇന്ത്യ സർജിക്കൽ സ്‌ട്രൈക്കിലൂടെ നൽകി. തങ്ങളുടെ വിഡ്ഢിത്തത്തിൽ നിന്ന് പിന്നോട്ട് പോയില്ലെങ്കിൽ, അതിർത്തികളിൽ നിയമലംഘനം നടത്തിയാൽ പാകിസ്താന് തക്കതായ മറുപടി ഇന്ത്യൻ സൈന്യം നൽകുമെന്നുള്ള സന്ദേശമാണ് സർജിക്കൽ സ്‌ട്രൈക്കിലൂടെ പ്രധാനമന്ത്രി നരേന്ദ്രമോദി മുന്നോട്ട് വെച്ചത്.

ഭീകരരുടെ ശക്തികേന്ദ്രത്തിൽ പ്രവേശിച്ച് വ്യോമാക്രമണം: 2019 ഫെബ്രുവരി 14-ന് പുൽവാമയിൽ ജെയ്‌ഷെ മുഹമ്മദ് (ജെഎം) ഭീകരാക്രമണത്തിൽ 40 സിആർപിഎഫ് ജവാൻമാർ വീരമൃത്യു വരിച്ചു. ജെ.ഇ.എമ്മിന്റെ ആക്രമണത്തിന് മോദി സർക്കാർ തിരിച്ചടിച്ചു. ഫെബ്രുവരി 26-ന് ജെയ്‌ഷെ ഇഎമ്മിന്റെ ഏറ്റവും വലിയ ഭീകര ക്യാമ്പായ ബാലാകോട്ടിൽ ചെന്ന് ഇന്ത്യൻ സൈന്യം തിരിച്ചടിച്ചു. ഇന്ത്യ നടത്തിയ വ്യോമാക്രമണത്തിൽ ഭീകരർക്കൊപ്പം അവരുടെ പരിശീലകനും മുതിർന്ന കമാൻഡറും കൊല്ലപ്പെട്ടു.

ദേശീയ യുദ്ധ സ്മാരകം: ഇന്ത്യയുടെ രക്തസാക്ഷികൾക്കുള്ള ആദരാഞ്ജലിയായ ദേശീയ യുദ്ധ സ്മാരകം പ്രധാനമന്ത്രി മോദി രാഷ്‌ട്രത്തിന് സമർപ്പിച്ചു. സ്വാതന്ത്ര്യത്തിനു ശേഷം രാജ്യത്തിനുവേണ്ടി വീരമൃത്യു വരിച്ച സൈനികർക്കുള്ള ആദരാഞ്ജലിയാണ് ഈ യുദ്ധസ്മാരകം. സർക്കാർ കണക്കുകൾ പ്രകാരം, സ്വതന്ത്ര ഇന്ത്യയിലെ 26,000 രക്തസാക്ഷികൾക്കുള്ളതാണ് ഈ സ്മാരകം. ത്യാഗചക്രത്തിൽ പേരുകൾ ആലേഖനം ചെയ്തവരെ അനുസ്മരിക്കാൻ എല്ലാ ദിവസവും വൈകുന്നേരങ്ങളിൽ ഇവിടെ ചടങ്ങുകളും നടക്കുന്നുണ്ട്.‌‌

ഒഎഫ്‌ബിയുടെ ആധുനികവൽക്കരണം: ഒഎഫ്‌ബി മുതൽ ഏഴ് പുതിയ പ്രതിരോധ കമ്പനികൾ മോദി സർക്കാർ രാജ്യത്തിന് സമർപ്പിച്ചു. ഓർഡനൻസ് ഫാക്ടറി ബോർഡ് ഒരു വകുപ്പിൽ നിന്ന് പൂർണമായും സർക്കാരിന്റെ ഉടമസ്ഥതയിലുള്ള ഏഴ് കോർപ്പറേഷനുകളാക്കി മാറ്റാൻ തീരുമാനിച്ചു. വ്യവസായം, സ്റ്റാർട്ടപ്പുകൾ, ഗവേഷണം എന്നിവയിൽ ഏർപ്പെട്ടിരിക്കുന്നവർക്കായി പ്രതിരോധത്തിനുള്ള ഗവേഷണ-വികസന ബജറ്റിന്റെ ഇരുപത്തിയഞ്ച് ശതമാനം നീക്കിവെച്ചു. സായുധ സേനയ്‌ക്ക് ആവശ്യമായ ആയുധങ്ങളും മറ്റ് സാധന സാമ​ഗ്രഹികളും ലഭ്യമാക്കാൻ സഹായിക്കുന്നതിന് ഡിഫൻസ് ഇന്നൊവേഷൻ സ്റ്റാർട്ടപ്പ് ചലഞ്ച് പോലുള്ള മത്സരങ്ങൾ സംഘടിപ്പിച്ചു. പ്രതിരോധ സാമഗ്രികളുടെ കയറ്റുമതിയിൽ 2014-15-ൽ 1,941 കോടി രൂപയിൽ നിന്ന് 334 ശതമാനം വർദ്ധനവുണ്ടായി. 2020-21-ൽ കയറ്റുമതി 8,434 കോടി രൂപയിലെത്തി. ഇന്ത്യയിൽ നിർമ്മിച്ച പ്രതിരോധ ഉൽപ്പന്നങ്ങൾ ഇന്ന് 84 രാജ്യങ്ങളിലേക്കാണ് കയറ്റുമതി ചെയ്യുന്നത്.

സംയുക്ത സൈനിക മേധാവി: ചീഫ് ഓഫ് ഡിഫൻസ് സ്റ്റാഫ്( സംയുക്ത സൈനിക മേധാവി) എന്നത് ഒരു ചരിത്രപരമായ ഒരു ചുവടുവെപ്പായിരുന്നു. കരസേനയുടെ മൂന്ന് ഭാഗങ്ങളും തമ്മിൽ ഏകോപനം ഉണ്ടാകണം എന്നതായിരുന്നു ഇതിന് പിന്നിലെ ആശയം. സൈന്യത്തെ സംബന്ധിച്ചിടത്തോളം വളരെ പ്രധാനപ്പെട്ട നിരവധി പരിഷ്കാരങ്ങൾ നടന്നു. ഈ തീരുമാനത്തോടെ, സൈന്യത്തിന്റെ എല്ലാ മേഖലകളിലും ഏകോപനം ശക്തമായി. അടിയന്തര സാഹചര്യത്തിൽ സ്‌പെയർ പാർട്‌സും വെടിമരുന്നും വാങ്ങാനുള്ള അധികാരവും സൈന്യത്തിന് നൽകിയിട്ടുണ്ട്. ഇപ്പോൾ ഏത് സേവന ആസ്ഥാനത്തിനും സ്വന്തമായി 300 കോടി രൂപ വരെ വാങ്ങാൻ കഴിയും. 2000 കോടി രൂപയുടെ പ്രതിരോധ ഇടപാടുകൾക്ക് പ്രതിരോധ മന്ത്രാലയത്തിനും ഇനി കാബിനറ്റ് അനുമതി ആവശ്യമില്ല.

കരസേനയിലെ സ്ത്രീ ശാക്തീകരണം: 557 വനിതാ ഉദ്യോഗസ്ഥർക്ക് കരസേനയിൽ സ്ഥിരം കമ്മീഷൻ ലഭിച്ചു. ആർമിയുടെ മിലിട്ടറി പോലീസ് കോർപ്‌സിൽ ആദ്യമായി 83 വനിതാ ജവാൻമാരെ നിയമിച്ചു. അഞ്ച് വനിതാ ഉദ്യോഗസ്ഥർക്ക് കേണൽ പദവിയിലേക്ക് സ്ഥാനക്കയറ്റം ലഭിച്ചു. ക്യാപ്റ്റൻ അഭിലാഷ ബരാക്ക് ആദ്യ വനിതാ കോംബാറ്റ് ഏവിയേറ്ററായി. 2019 റിപ്പബ്ലിക് ദിന പരേഡിൽ ആർമി സർവീസ് കോർപ്സിനെ നയിച്ചുകൊണ്ട് ക്യാപ്റ്റൻ ഭാവന കസ്തൂരി ചരിത്രത്തിൽ തന്റെ പേര് അടയാളെപ്പെടുത്തി.

വൺ റാങ്ക് വൺ പെൻഷൻ (ഒ‌ആർ‌ഒ‌പി): പ്രതിരോധ മേഖലയിലെ മറ്റൊരു നിർണായക തീരുമാനമായിരുന്നു വൺ റാങ്ക് വൺ പെൻഷൻ. വളരെക്കാലമായി മുടങ്ങിക്കിടന്ന പെൻഷൻ പദ്ധതി മോദി സർക്കാർ നടപ്പിലാക്കി. ഇത് പ്രകാരം 20.6 ലക്ഷം പെൻഷൻകാർക്കോ അവരുടെ കുടുംബാംഗങ്ങൾക്കോ ​​കുടിശ്ശിക നൽകി. ഈ പദ്ധതിയിൽ സർക്കാരിന്റെ വാർഷിക ചെലവ് 7,123 കോടി രൂപയാണ്. ഇതോടൊപ്പം സ്പർശ് പദ്ധതിയും ആരംഭിച്ചു. ഈ പെൻഷൻകാർക്ക് ഇടനിലക്കാരുടെ പങ്കാളിത്തമില്ലാതെ അവരുടെ ബാങ്ക് അക്കൗണ്ടുകളിൽ നേരിട്ട് പണം ലഭിക്കുന്നു. ഈ സ്പർഷ് പ്ലാറ്റ്‌ഫോമിലെ 5 ലക്ഷത്തിലധികം പെൻഷൻകാർക്ക് 2021-22 ൽ 11,600 കോടി രൂപ അനുവദിച്ചു.

ഇന്ത്യയിൽ നിർമ്മിച്ച ആദ്യത്തെ തദ്ദേശീയ വിമാനവാഹിനി യുദ്ധക്കപ്പൽ: സ്വാതന്ത്ര്യത്തിന്റെ 75 വർഷത്തിൽ ആദ്യത്തെ തദ്ദേശീയ വിമാനവാഹിനിക്കപ്പലായ ഐഎൻഎസ് വിക്രാന്ത് നരേന്ദ്രമോദി രാജ്യത്തിന് സമർപ്പിച്ചു. ഐഎൻഎസ് വിക്രാന്ത് നാവികസേനയുടെ ഭാ​ഗമായി. ഇന്ത്യ സ്വയം പര്യാപ്തത നേടുന്നതിന്റെ അതുല്യമായ പ്രതിഫലനമാണ് വിക്രാന്ത്. ഇതോടൊപ്പം ഐഎൻഎസ് കൽവാരി S-2 എന്ന ഒരു സ്കോർപീൻ ക്ലാസ് അന്തർവാഹിനിയും നരേന്ദ്രമോദി കമ്മീഷൻ ചെയ്തു. ഇത്തരത്തിലുള്ള അഞ്ച് അന്തർവാഹിനികൾ നാവികസേനയ്‌ക്ക് നൽകും.

ദുരിതാശ്വാസ, രക്ഷാപ്രവർത്തനത്തിന് മുന്നിൽ: സാധാരണക്കാർക്ക് അഭയമാകാൻ സൈന്യത്തിന് സാധിച്ചു. റഷ്യ-യുക്രെയ്ൻ യുദ്ധം നടക്കവെ യുക്രെയ്നിൽ കുടുങ്ങിയ 25000 ഇന്ത്യക്കാരെ ഓപ്പറേഷൻ ഗംഗയുടെ കീഴിൽ ഇന്ത്യൻ വ്യോമസേന രാജ്യത്ത് തിരികെ എത്തിച്ചു. ഇതിനായി സി-17 വിമാനം 17 തവണയാണ് പറന്നത്. 2021-ൽ അഫ്ഗാനിസ്ഥാനിൽ നിന്ന് 579 ഇന്ത്യൻ പൗരന്മാരെയും ഇന്ത്യൻ വ്യോമസേന വിജയകരമായി ഒഴിപ്പിച്ചു. 2015-ൽ നേപ്പാളിൽ ഭൂകമ്പത്തെ തുടർന്നുണ്ടായ വൻ നാശനഷ്ടങ്ങൾക്ക് ശേഷം ഓപ്പറേഷൻ മൈത്രിക്ക് കീഴിൽ വ്യോമസേന ജനങ്ങളെ രക്ഷപ്പെടുത്തി. 6000 പേരെയാണ് ഇവിടെ നിന്നും സേന ഒഴിപ്പിച്ചത്. കൂടാതെ, കൊറോണയുടെ ആദ്യ തരംഗം വന്നപ്പോൾ വ്യോമസേനയും ഇന്ത്യൻ നാവികസേനയും ചേർന്ന് ചൈനയിൽ നിന്നും മറ്റ് രാജ്യങ്ങളിൽ നിന്നും 4200 ഇന്ത്യക്കാരെ ഒഴിപ്പിച്ചിരുന്നു.