നേവിയിൽ അഗ്നിവീറാകാം; 1465 ഒഴിവ്; അപേക്ഷിക്കേണ്ടതിങ്ങനെ..

നാവികസേന 2023 നവംബർ (02/2023) ബാച്ചിലേക്കുള്ള അഗ്നിവീർ റിക്രൂട്ട്മെന്റിന് അപേക്ഷ ക്ഷണിച്ചു. 1465 ഒഴിവാണുള്ളത്. ഇതിൽ 100 ഒഴിവുകൾ മെട്രിക് റിക്രൂട്ട്‌സ് (എംആർ) വിഭാഗത്തിലും 1365 ഒഴിവ് സീനിയർ സെക്കൻഡറി റിക്രൂട്ട്‌സിലും (എസ്എസ്ആർ) ആണ്. രണ്ട് വിഭാഗത്തിലുമായി 293 ഒഴിവുകൾ വനിതകൾക്കായി നീക്കിവെച്ചിട്ടുണ്ട്. അവിവാഹിതർക്ക് അപേക്ഷിക്കാവുന്നതാണ്. നാല് വർഷത്തേയ്‌ക്കാകും നിയമനം. സേവനമികവ് പരിഗണിച്ച് 25 ശതമാനം പേർക്ക് പിന്നീട് സ്ഥിരം നിയമനം നൽകും.

മെട്രിക് റിക്രൂട്ട്‌സിന് പത്താംക്ലാസ് വിജയമാണ് യോഗ്യത. എസ്എസ്ആർ വിഭാഗത്തിൽ അപേക്ഷിക്കാൻ മാത്തമാറ്റിക്‌സ്, ഫിസിക്‌സ് എന്നിവയും കെമിസ്ട്രി/ബയോളജി/കംപ്യൂട്ടർ സയൻസ് എന്നിവയിലൊന്നും വിഷമായി പഠിച്ച് പ്ലസ്ടു ജയിച്ചിരിക്കണം. പുരുഷന്മാർക്ക് കുറഞ്ഞത് 157 സെന്റീമീറ്ററും വനിതകൾക്ക് 152 സെന്റീ മീറ്ററും ഉയരമുണ്ടായിരിക്കണം. മികച്ച ശാരീരികക്ഷമത, കാഴ്ചശക്തി എന്നിവയുണ്ടായിരിക്കണം. അപേക്ഷകർ 2002 നവംബർ ഒന്നിനും 2006 ഏപ്രിൽ 30-നും മദ്ധ്യേ ജനിച്ചവരാകണം. agniveernavy.cdac.in വഴി അപേക്ഷിക്കാവുന്നതാണ്. ജൂൺ 15-നാണ് അവസാന തീയതി.

രണ്ട് ഘട്ടമായി എഴുത്തുപരീക്ഷ, ശാരീരിക ക്ഷമതാപരീക്ഷ, വൈദ്യപരിശോധന എന്നിവയുടെ അടിസ്ഥാനത്തിലായിരിക്കിം തിരഞ്ഞെടുപ്പ്. ഒഡീഷയിലെ ഐഎൻഎസ് ചിൽക്കയിലായിരിക്കും പരിശീലനം. എംആർ വിഭാഗത്തിലേക്ക് 100 മാർക്കിനുള്ള എഴുത്തുപരീക്ഷയ്‌ക്ക് ഒരു മണിക്കൂറായിരിക്കും സമയം. തെറ്റുത്തരത്തിന് 0.25 നെഗറ്റീവ് മാർക്കുണ്ടായിരിക്കും. യോഗ്യതയ്‌ക്ക് അനുസൃതമായ സിലബസ് ആയിരിക്കും പരീക്ഷയ്‌ക്ക് ഉണ്ടാവുക. 1.6 കിലോമീറ്റർ ഓട്ടം, പുഷ്-അപ്പ്, സിറ്റ്-അപ്പ്, സ്‌ക്വാട്ട് എന്നിവ ഉൾപ്പെടുന്നതായിരിക്കും ശാരീരികക്ഷമത പരീക്ഷ. വനിതകൾക്ക് പുഷ് അപ്പും, പുരുഷന്മാർക്ക് സിറ്റ്-അപ്പും ഉണ്ടായിരിക്കില്ല.

തിരഞ്ഞെടുക്കപ്പെടുന്നവർക്ക് ആദ്യ വർഷം 30,000 രൂപയും അടുത്ത മൂന്ന് വർഷങ്ങളിൽ 33,000 രൂപ, 36,500 രൂപ, 40,000 രൂപ എന്നിങ്ങനെയായിരിക്കും പ്രതിമാസ വേതനം. ഇതിൽ നിന്ന് 30 ശതമാനം അഗ്നീവീർ കോർപസ് ഫണ്ടിലേക്ക് വകയിരിത്തും. നാല് വർഷ സേവനത്തിന് ശേഷം സേനയിൽ നിന്ന് പിരിയുന്നവർക്ക് ഏകദേശം 10.04 ലക്ഷം രൂപ സേവാനിധി പാക്കേജായി നൽകും.