മുംബൈ: ഐപിഎൽ 2023 സീസൺ കിരീട നേട്ടത്തിന് പിന്നാലെ മഹേന്ദ്ര സിംഗ് ധോണി ആശുപത്രിയിൽ ചികിത്സ തേടും. മഹേന്ദ്ര സിംഗ് ധോണി കാൽമുട്ടിലെ പരിക്കിനെ തുടർന്ന് മുംബൈയിലെ കോകിലാബെൻ ആശുപത്രിയിൽ ഈയാഴ്ച എത്തുമെന്നാണ് സൂചന.
താരത്തിന് ഒന്നിലധികം പരുക്കുകൾ ഉണ്ടെന്നാണ് റിപ്പോർട്ടുകൾ. ഏറ്റവും വലിയ പരിക്ക് ഇടത് കാൽമുട്ടിലേതാണ്. ധോണിയുടെ പരിക്കിനെ കുറിച്ച് ഈ സീസണിൽ ആദ്യം ചെന്നൈ ഹെഡ് കോച്ച് സ്റ്റീഫൻ ഫ്ലെമിംഗ് വ്യക്തമാക്കിയിരുന്നു. കാലിൽ സ്ട്രാപ്പും ഗാർഡും ധരിച്ചായിരുന്നു ധോണി കളിക്കാനിറങ്ങിയത്.
അഞ്ച് തവണയാണ് ധോണിയുടെ ക്യാപ്റ്റൻസിയിൽ ചെന്നൈ ഐപിഎല്ലിൽ വിജയം സ്വന്തമാക്കിയത്. ഇത്തവണ ഫൈനൽ വിജയത്തിന്ശേഷം ഐപിഎല്ലിൽ നിന്നും വിരമിക്കൽ പ്രഖ്യാപിക്കുമോ എന്ന ചോദ്യങ്ങൾക്ക് വിരമിക്കൽ പ്രഖ്യാപിക്കുക എന്നത് തന്റെ മുന്നിലുള്ള എളുപ്പവഴിയാണെന്നും എന്നാൽ കഠിനമായ വഴിയെ ഇഷ്ടപ്പെടുന്ന ആളാണ് താനെന്നുമായിരുന്നു ധോണിയുടെ മറുപടി. വരുന്ന ഒൻപത് മാസത്തോളം അദ്ധ്വാനിച്ച് ഐപിഎല്ലിൽ കളിക്കുക എന്നതാണ് ലക്ഷ്യമെന്നും ശരീരം അനുവദിച്ചാൽ കളിക്കുമെന്നുമാണ് ധോണി നൽകിയ ഉത്തരം.
