അപൂർവ്വങ്ങളിൽ അപൂർവ്വമായ വെള്ള പാണ്ടയുടെ ചിത്രങ്ങൾ വൈറലാകുന്നു. ചൈനയിലെ വൂലോങ് നാഷണൽ നേച്ചർ റിസർവിലാണ് ഈ വെള്ള പാണ്ടയുള്ളത്. ലോകത്ത് ജീവിച്ചിരിക്കുന്ന ഏക വെള്ള പാണ്ട ഇതാണെന്നാണ് റിപ്പോർട്ട്.
ശരീരം പൂർണമായും വെള്ളനിറത്തിൽ കാണപ്പെടുന്ന ഈ പാണ്ടയെ ആൽബിനോ പാണ്ടയെന്നാണ് വിശേഷിപ്പിക്കുന്നത്. ഏകദേശം ആറ് വയസുള്ള ഈ പാണ്ട നിലവിൽ പൂർണ ആരോഗ്യത്തോടെയാണ് തുടരുന്നതെന്ന് അധികൃതർ അറിയിച്ചു. ആദ്യമായി 2019ലായിരുന്നു ആൽബിനോ പാണ്ടയെ വൈൽഡ് ലൈഫ് റിസർവിൽ കണ്ടെത്തിയത്. അപൂർവ്വമായ ഈ പാണ്ടയെ നിരീക്ഷിക്കുന്നതിനായി പ്രത്യേക സംഘത്തെ അധികൃതർ ചുമതലപ്പെടുത്തിയിട്ടുണ്ട്.
സമുദ്രനിരപ്പിൽ നിന്നും 2,600 മീറ്റർ ഉയരത്തിലാണ് വൂലോങ് നാഷണൽ നേച്ചർ റിസർവ് സ്ഥിതിചെയ്യുന്നത്. ഇവിടെയുള്ള ബ്ലാക്ക് ആൻഡ് വൈറ്റ് പാണ്ടകളോടൊപ്പം ആൽബിനോ പാണ്ട മഞ്ഞിൽ കളിക്കുന്ന ചിത്രങ്ങൾ പങ്കുവച്ചിരിക്കുകയാണ് അധികൃതർ. ചൈനയിലെ സിചുവാൻ, ഷാൻസി, ഗാൻസു പ്രവിശ്യകളിൽ പാണ്ടകളെ ധാരളമായി കാണപ്പെടുന്നത് പതിവാണ്.
Comments