ഇന്ത്യൻ ക്രിക്കറ്റ് ഇതിഹാസം സച്ചിൻ തെണ്ടുൽക്കർ വാഹനങ്ങൾ സ്വന്തമാക്കുന്നതിൽ പ്രശസ്തനാണ്. മിക്ക ആഡംബരവാഹനങ്ങളും അദ്ദേഹത്തിന്റെ ഗ്യാരേജിലുണ്ട്. അദ്ദേഹം തന്റെ വാഹന ശേഖരത്തിലേക്ക് ഏറ്റവും ഒടുവിൽ എത്തിച്ചിരിക്കുന്നത് ലംബോർഗിനി ഉറുസ് എസ് ആണ്. സച്ചിൻ ആദ്യം സ്വന്തമാക്കിയ കാർ മാരുതി 800 ആയിരുന്നു.
സച്ചിന്റെ ഗാരേജിൽ നിസാൻ ജിടിആർ, ബിഎംഡബ്ല്യു തുടങ്ങി നിരവധി കാറുകളുടെ ശേഖരമുണ്ട്. താരം യഥാർത്ഥത്തിൽ ഇന്ത്യയിൽ ബിഎംഡബ്ല്യുവിന്റെ ബ്രാൻഡ് അംബാസിഡറും കൂടിയാണ്. മേയ് അവസാനത്തോടെ മുംബൈ വെസ്റ്റിലാണ് ഉറുസ് രജിസ്റ്റർ ചെയ്തിരിക്കുന്നത്. ഈ വാഹനത്തിന്റെ ഇന്ത്യയിലെ എക്സ്ഷോറൂം 4.18 കോടി രൂപയാണ്. ഉറുസ് എസ് ആഗോള വിപണിയിൽ അവതരിപ്പിച്ചത് 2022 സെപ്റ്റംബറിലാണ്. ഈ വാഹനം കഴിഞ്ഞ മാസമാണ് ഇന്ത്യൻ വിപണിയിൽ അവതരിപ്പിക്കുന്നത്. ലംബോർഗിനിയുടെ ആദ്യ എസ്.യു.വി. മോഡലായ ഉറുസ് 2017-ലാണ് പുറത്തിറക്കുന്നത്.
ഉറുസിന്റെ പെർഫോമെന്റെ പതിപ്പിൽ ചില പുതുമകളോടെയാണ് എസ് എത്തിയിരിക്കുന്നത്. കാഴ്ച്ചയിൽ പെർഫോമെന്റെ പതിപ്പിന് സമാനമായാണ് ഉറുസ് എസും. കേവലം 3.5 സെക്കന്റിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാനും ഈ വാഹനത്തിനാകും. പെർഫോമെന്റെ പതിപ്പിന് 3.3 സെക്കന്റിൽ 100 കിലോമീറ്റർ വേഗത കൈവരിക്കാനുള്ള ശേഷിയാണുള്ളത്. വലിയ തോതിലുള്ള കസ്റ്റമൈസേഷനുള്ള അവസരം ഒരുക്കിയാണ് ഈ വാഹനം പുറത്തിറക്കിയിരിക്കുന്നത്.
