ചുരുങ്ങിയ കാലയളവിനുള്ളിൽ തന്നെ തെന്നിന്ത്യയിൽ നിരവധി ആരാധകരെ സ്വന്തമാക്കിയ താരമാണ് തമിഴ് നടൻ സൂരി. ചെറിയ വേഷങ്ങളിൽ തുടങ്ങി വെള്ളിത്തിരയിൽ ഇറങ്ങുന്ന ചിത്രങ്ങളിൽ ഒഴിച്ചു നിർത്താൻ കഴിയാത്ത ഘടകമായി സൂരി മാറിക്കഴിഞ്ഞിരുന്നു. ഒടുവിൽ നായകനായുള്ള അരേങ്ങേറ്റവും മനോഹരമാക്കി. തന്റെ ആരാധകരുമായി ആത്മബന്ധം സൂക്ഷിക്കുന്നതിലും സൂരി പിന്നിലല്ല. ആരാധകർക്കായി നേരിട്ടും അല്ലാതെയും സഹായങ്ങളെത്തിക്കുന്ന ആൾ കൂടിയാണ് സൂരി. ഇപ്പോഴിതാ അത്തരത്തിൽ ഒരു സംഭവം വാർത്തകളിൽ ഇടംപിടിക്കുകയാണ്.
മഹാതീരൻ എന്ന ആരാധകന്റെ അമ്മയുടെ രോഗവിവരം അറിയാനിടയായ താരം കുടുംബത്തെ നേരിൽക്കാണാൻ എത്തുകയായിരുന്നു. മധുരൈ ഭാഗ്യനാഥപുരത്താണ് ആരാധകന്റെ വീട്. തീരന്റെ വീട്ടിലെത്തിയ താരം ആരാധകന്റെ അമ്മയുടെ രോഗവിവരങ്ങൾ ചോദിച്ചറിയുകയും ചെയ്തു. എന്നാൽ തന്റെ ആരാധകനെ കാണാനായി സൂരി എത്തിയത് ഒട്ടും താര ജാഡയില്ലാതെ ആയിരുന്നു. ഓട്ടോറിക്ഷയിലാണ് താരം എത്തിയത്.
ആരാധകർ തന്നെ ഒരുപാട് സ്നേഹിക്കുന്നുണ്ട്. തന്റെ സ്വന്തം അമ്മയെപോലെ കരുതിയാണ് ആരാധകന്റെ അമ്മയെ കാണാൻ പോയത് എന്നായിരുന്നു മധുരയിലെത്തിയ സൂരിയുടെ പ്രതികരണം. പിഎസ് വിനോദ് രാജ് സംവിധാനം ചെയ്യുന്ന കൊട്ടുകാളി എന്ന ചിത്രത്തിൽ സൂരിയാണ് നായകൻ. അന്നാ ബെൻ ആണ് നായികയായെത്തുന്നത്. വെട്രിമാരൻ സംവിധാനം ചെയ്യുന്ന സൂര്യ ചിത്രം വാടിവാസലിലും സൂരി പ്രധാന വേഷത്തിൽ എത്തുന്നുണ്ട്.
