കലാഭവൻ ഷാജോൺ നായകനാകുന്ന പുത്തൻ ചിത്രമായ ‘സിഐഡി രാമചന്ദ്രൻ റിട്ട. എസ്ഐ’ന്റെ ഫസ്റ്റ് ലുക്ക് പോസ്റ്റർ പുറത്തുവന്നു. സനൂപ് സത്യന്റെ സംവിധാനത്തിലൊരുങ്ങുന്ന ചിത്രമാണ് ‘സിഐഡി രാമചന്ദ്രൻ റിട്ട. എസ്ഐ’. ചിത്രത്തിന്റെ തിരകഥയും സംവിധാനവും സനൂപ് സത്യനാണ് നിർവഹിക്കുന്നത്. താരങ്ങളായ സുരേഷ് ഗോപി, ദിലീപ് എന്നിവരുടെ ഒഫീഷ്യൽ സോഷ്യൽ മീഡിയ പ്ലാറ്റ്ഫോമിലൂടെയാണ് പോസ്റ്റർ പുറത്തുവിട്ടിരിക്കുന്നത്.
ഹാസ്യകഥാപാത്രങ്ങളിൽ നിന്ന് സീരിയസ് കഥാപാത്രങ്ങളിലൂടെ പ്രേക്ഷക ശ്രദ്ധ നേടിയ താരമാണ് കലാഭവൻ ഷാജോൺ. ചിത്രത്തിലെ കേന്ദ്ര കഥാപാത്രമായ രാമചന്ദ്രനായിട്ടാണ് ഷാജോൺ വേഷമിടുന്നത്. 35 വർഷത്തോളം പോലീസിന്റെ ക്രൈം വിഭാഗത്തിൽ ജോലി ചെയ്ത് സർവീസിൽ നിന്നും വിരമിച്ചയാളാണ് രാമചന്ദ്രൻ. ജോലിയിൽ നിന്ന് വിരമിച്ച ശേഷം രാമചന്ദ്രൻ സ്വന്തം നിലയിൽ ഒരു അന്വേഷണ ഏജൻസി ആരംഭിക്കുകയും പോലീസ് ഡിപ്പാർട്ട്മെന്റിനെ സഹായിക്കുന്നതുമാണ് ചിത്രത്തിന്റെ പ്രമേയം.
ബൈജു സന്തോഷ്, അനുമോൾ, സുധീർ കരമന, പ്രേം കുമാർ, ഉണ്ണി രാജാ, അസീസ് നെടുമങ്ങാട്, ആനന്ദ് മഹാദേവൻ, ഗീതി സംഗീത, ബാദ്ഷാ, അരുൺ പുനലൂർ, ലഷ്മിദേവൻ, കല്യാൺ ഖാനാ എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. ദീപക് ചന്ദ്രനാണ് ചിത്രത്തിന്റെ ഗാനങ്ങൾ സംവിധാനം ചെയ്യുന്നത്. എഡി 1877 സെൻസ് ലോഞ്ച് എന്റെർടെയിൻമെന്റിന്റെ ബാനറിലാണ് ചിത്രം നിർമ്മിക്കുന്നത്.
Comments