സ്‌കൂൾ തുറന്നതോടെ രാവിലെ വീട്ടമ്മമാർ വലിയ തിരക്കുകളിലേയ്‌ക്ക് കടന്നിരിക്കുകയാണ്. മിക്കവാറും പ്രഭാതത്തിൽ സ്‌കൂൾ കുട്ടികളുള്ള വീടുകളിൽ ലെഞ്ച്ബോക്സ് തയ്യാറാക്കുന്ന തിരക്കുകൾ ആയിരിക്കും. ചോറും കറികളും മാത്രമായി ദിവസവും കൊടുത്തയച്ചാലും എല്ലാ കുട്ടികൾക്കും കഴിക്കാൻ മടിയുണ്ടാകും. അത്തരത്തിലുളള എല്ലാ ബുദ്ധിമുട്ടുകളും മാറ്റാവുന്ന ഒരു വിഭവമാണ് തക്കാളിച്ചോറ്. നല്ല ബിരിയാണിയുടെ രുചിയിലുണ്ടാക്കാവുന്ന തക്കാളിച്ചോറ്. വളരെ എളുപ്പത്തിൽ തയ്യാറാക്കാവുന്നതാണ്. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്നതുമായ വിഭവമാണ് ഇത് രുചികരമായ തക്കാളിച്ചോറ് എങ്ങനെ റേഷൻ പുഴുക്കലരിയിൽ ഉണ്ടാക്കുമെന്ന് നോക്കാം.
ചേരുവകൾ
സവാള 2
പഴുത്ത തക്കാളി – മൂന്നെണ്ണം (വലുത്)
താളിച്ച് ചേർക്കാനായി : കടലപ്പരിപ്പ്, വറ്റൽമുളക്, മഞ്ഞൾപ്പൊടി, മുളക് പൊടി, മല്ലിപ്പൊടി, കായപ്പൊടി, മസാലപ്പൊടി
റേഷൻ പുഴുക്കലരി ചോറ് – രണ്ട് കപ്പ്
ഉപ്പ്
മല്ലിയില, നെയ്യ് (ആവശ്യമെങ്കിൽ)
പാൻ ചൂടാക്കി എണ്ണയൊഴിച്ച് താളിക്കുകയാണ് ആദ്യം ചെയ്യേണ്ടത്. ഇതിനായി എണ്ണയൊഴിച്ച് കടലപ്പരിപ്പ് ചേർത്ത് നിറംമാറുന്നതുവരെ ഇളക്കുക. നിറംമാറിവരുമ്പോൾ രണ്ട് വറ്റൽ മുളക് ചെറുതായി മുറിച്ച് ചേർക്കുക. ശേഷം അരിഞ്ഞുവെച്ചിരിക്കുന്ന സവാള ചേർത്ത് നന്നായി വേകുന്നതുവരെ ഇളക്കുക. നിറം മാറിത്തുടങ്ങുമ്പോൾ പഴുത്ത തക്കാളി ചേർത്ത് ഇളക്കുക. ശേഷം മഞ്ഞൾപ്പൊടി, മുളക് പൊടി, മല്ലിപ്പൊടി, കായപ്പൊടി, ഉപ്പ് എന്നിവ ചേർത്ത് ഒന്നുകൂടി നന്നായി ഇളക്കി ചെറുതീയിൽ പാൻ മൂടിവെച്ച് വേവിക്കുക. രണ്ട് മിനിട്ട് കഴിഞ്ഞ് വേവിച്ച് വെച്ചിരിക്കുന്ന ചോറ് ചേർത്ത് നന്നായി മിക്സ് ചെയ്യുക. അതിന് ശേഷം ആവശ്യത്തിന് മസാലപ്പൊടി ചേർത്ത് ഇളക്കി തക്കാളിച്ചോറി പാനിൽ നന്നായി ഒതുക്കി വെക്കുക. ശേഷം മല്ലിയില വിതറി നെയ്യും ചേർത്ത്, തീ ഓഫ് ചെയ്ത് കുറച്ചുനേരം പാൻ നന്നായി മൂടിവെക്കുക. അഞ്ച് മിനിട്ട് കഴിഞ്ഞാൽ ഒന്നുകൂടി ഇളക്കി ചേർത്ത് തക്കാളിച്ചോറ് ഉപയോഗിക്കാവുന്നതാണ്.
തക്കാളിച്ചോറിന്റെ മസാല തയ്യാറാക്കുമ്പോൾ ഇഞ്ചിയും വേളുത്തിയും പച്ചമുളകും ആവശ്യമെങ്കിൽ ചേർക്കാവുന്നതാണ്. ഇത് ഓപ്ഷണലാണ്.
മസാല തയ്യാറാക്കുമ്പോൾ വെള്ളം ചേർക്കേണ്ടതില്ല, തക്കാളിയിൽനിന്ന് വേകുമ്പോൾ വരുന്ന വെള്ളം ധാരാളമാണ്.
മസാലയിലേയ്‌ക്ക് ചോറ് ചേർത്തശേഷം ആവശ്യമെങ്കിൽ മാത്രം ഉപ്പ് ചേർക്കുക
