കാഞ്ചീപുരം: കാഞ്ചീപുരം ക്ഷേത്രാങ്കണത്തിൽ കൊൽക്കത്ത നൈറ്റ് റൈഡേഴ്സ് താരം വെങ്കിടേഷ് അയ്യർ ക്രിക്കറ്റ് കളിക്കുന്ന വീഡിയോ സമൂഹ മാദ്ധ്യമങ്ങളിൽ പ്രചരിക്കുന്നു. ഐപിഎല്ലിന് ശേഷമുള്ള ആദ്യ ക്ഷേത്രസന്ദർശന വേളയിലായിരുന്നു താരത്തിന്റെ ക്രിക്കറ്റ് കളി. ക്ഷേത്രങ്കണത്തിലെ താരത്തിന്റെ ക്രിക്കറ്റുകളി ആരാധകർ ഇതിനോടകം ഏറ്റെടുത്തിരിക്കുകയാണ്.
ക്ഷേത്രത്തിലെ വേദപാഠശാലയിലെ കുട്ടികൾക്കൊപ്പമായിരുന്നു താരം ക്രിക്കറ്റ് കളിച്ചത്. കുട്ടികൾക്കൊപ്പമുള്ള സെൽഫിയും, വീഡിയോയും താരം തന്നെയാണ് സമൂഹ മാദ്ധ്യമങ്ങളിൽ പങ്കുവെച്ചത്. കാഞ്ചീപുരത്തെ വേദപാഠശാലയിലെ വിദ്യാർഥികൾക്കൊപ്പം കുറച്ചുസമയം ചെലവഴിച്ചു, എന്ന കുറിപ്പോടെയാണ് താരം വീഡിയോയും ചിത്രവും പങ്കുവെച്ചത്.
2023-ലെ ഐപിഎല്ലിൽ കൊൽക്കത്തയ്ക്ക് വേണ്ടി 14 മത്സരങ്ങളിൽ നിന്ന് 404 റൺസാണ് വെങ്കിടേഷ് സ്വന്തമാക്കിയത്. ഒരു സെഞ്ച്വറിയും രണ്ട് അർധസെഞ്ച്വറിയും നേടി താരം മിന്നും പ്രകടനമായിരുന്നു കാഴ്ചവെച്ചത്. കൊൽക്കത്ത നൈറ്റ് റൈഡേഴ്സിനുവേണ്ടി സെഞ്ചുറി നേടുന്ന ആദ്യ ഇന്ത്യൻ താരം എന്ന റെക്കോഡും വെങ്കടേഷ് പതിനാറാം സീസണിൽ സ്വന്തമാക്കിയിരുന്നു.
