കണ്ണിറുക്കലിന് പിന്നിലെ ആശയം എന്റേതെന്ന് പ്രിയ വാര്യർ; ഓർമ്മകുറവിന് വല്ല്യചന്ദനാദി ബെസ്റ്റാണെന്ന് ഒമർ ലുലു

ചുരുങ്ങിയ കാലം കൊണ്ട് പ്രേക്ഷകർക്കിടയിൽ ശ്രദ്ധ നേടിയ നടിയാണ് പ്രിയ വാര്യർ. ഒമർ ലുലു സംവിധാനം ചെയ്ത ‘ഒരു അഡാർ ലവ്’ എന്ന ചിത്രത്തിലെ ​ഗാനരം​ഗത്തിലെ ഒരു കണ്ണിറുക്കലും പുരികം ഉയർത്തലിലൂടെയുമാണ് താരത്തെ പ്രശസ്തയാക്കിയത്. തുടർന്നാണ് വൈറലാകുന്നതും അന്യഭാഷ ചിത്രങ്ങളിൽ അഭിനയിക്കുന്നതും.

എന്നാൽ, അടുത്തിടെ പേർളി മാണിയ്‌ക്ക് നൽകിയ അഭിമുഖത്തിൽ പ്രിയ വാര്യർ കണ്ണിറുക്കലിന് പിന്നിലെ ആശയം തന്റേതാണെന്ന് പറഞ്ഞിരുന്നു. വളരെപെട്ടെന്ന് തന്നെ പ്രിയയുടെ മറുപടി വൈറലാകുകയും ചെയ്തു. കണ്ണിറുക്കൽ സംവിധായകൻ പറഞ്ഞിട്ടാണോ ചെയ്തതെന്ന് പേർളിയുടെ ചോദ്യത്തിന് അത് താൻ കെെയിൽനിന്ന് ഇട്ടതാണെന്നായിരുന്നു പ്രിയ നൽകിയ മറുപടി.

പ്രിയയുടെ വാക്കുകൾ വൈറലായതിന് പിന്നാലെ സംഭവത്തിൽ പ്രതികരണവുമായി എത്തിയിരിക്കുകയാണ് ഒമർ ലുലു. കണ്ണിറുക്കല്‍ ഐഡിയ ഒമർ ലുലുവിന്റേതാണെന്ന് വർഷങ്ങൾക്ക് മുൻപ് പ്രിയ പറയുന്ന വീഡിയോ പങ്കുവെച്ചുകൊണ്ടാണ് സംവിധായകൻ പ്രതികരിച്ചിരിക്കുന്നത്. പ്രിയയുടെ പുതിയ പ്രസ്താവനയും വീഡിയോയിലുണ്ട്. അഞ്ച് വർഷം ആയി എന്നും പാവം കുട്ടി മറന്നതാവുമെന്നും ഒമർ ലുലു വീഡിയോയ്‌ക്കൊപ്പം കുറിച്ചു. “അഞ്ച് വർഷം ആയി, പാവം കുട്ടി മറന്നതാവും വല്ല്യചന്ദനാദി ഓർമ്മകുറവിന് ബെസ്റ്റാ” എന്ന ക്യാപ്ഷനും ഒമര്‍ നല്‍‍കിയിട്ടുണ്ട്. ഇതിന് പുറമേ മറ്റൊരു പോസ്റ്റില്‍ വല്ല്യചന്ദനാദി എണ്ണക്കുപ്പിയുടെ ചിത്രവും ഒമര്‍ പങ്കുവെച്ചിട്ടുണ്ട്.