കൊച്ചി:നടൻ കൊല്ലം സുധിയുടെ വിയോഗത്തിന് കാരണമായ കാറപകടത്തിൽ പരിക്കേറ്റ് ചികിത്സയിലുള്ള മഹേഷ് കുഞ്ഞുമോന്റെ ശസ്ത്രക്രിയ വിജയകരം. മഹേഷിന്റെ ശസ്ത്രക്രിയ ഒമ്പത് മണിക്കൂറോളം നീണ്ടുനിന്നു. മഹേഷിന്റെ സുഹൃത്തും നടനുമായ ബിനീഷ് ബാസ്റ്റിനാണ് ഇക്കാര്യം അറിയിച്ചത്. നിലവിൽ കൊച്ചി അമൃത ആശുപത്രിയിലാണ് മഹേഷ് ചികിത്സയിലുള്ളത്.
‘മഹേഷ് കുഞ്ഞുമോന്റെയും ബിനുച്ചേട്ടന്റെയും ഡ്രൈവർ ഉല്ലാസ് അരൂരിന്റെയും കാര്യം ഒരുപാട് പേര് അന്വേഷിക്കുന്നുണ്ട്. ഇന്നലെ രാത്രിയാണ് മഹേഷിന്റെ ശസ്ത്രക്രിയ കഴിഞ്ഞത്. ഇനിയും ചെറിയ ഒപ്പറേഷനൊക്കെ ഉണ്ട്. ഉല്ലാസിന് ചെറിയ പരിക്കുകളേ ഉള്ളൂ. പോയി കണ്ടിരുന്നു. അടുത്ത ദിവസങ്ങളിൽ ഡിസ്ചാർജ് ആകും. അപകടത്തിന്റെയും സുധിച്ചേട്ടന്റെ മരണത്തിന്റെയും ഷോക്കിൽ നിന്നും ബിനു ചേട്ടൻ മുക്തനായിട്ടില്ല. സുധിച്ചേട്ടന്റെ മുഖം മനസിൽ നിന്നും മാഞ്ഞിട്ടില്ല. തനിക്കായി പ്രാർത്ഥിക്കണമെന്ന് ബിനുച്ചേട്ടൻ പറഞ്ഞിട്ടുണ്ട്’, എന്നായിരുന്നു ബിനീഷിന്റെ വാക്കുകൾ.
തിങ്കളാഴ്ചയായിരുന്നു കൊല്ലം സുധിയുടെ വിയോഗത്തിന് കാരണമായ അപകടം നടന്നത്. പുലർച്ചെ നാലരമണിയോടെ തൃശൂർ കൈപ്പമംഗലത്തായിരുന്നു അപകടം. വടകരയിൽ നടന്ന പ്രോഗ്രാം കഴിഞ്ഞ് മടക്കയാത്രയിലായിരുന്നു അപകടം സംഭവിച്ചത്.
Comments