ന്യൂയോർക്ക്: കാനഡയിൽ കാട്ടുതീ പടർന്നതോടെ ന്യൂയോർക്ക് നഗരം മുഴുവൻ പുകയിൽ മൂടപ്പെട്ടിരിക്കുകയാണ്. വായുവിന്റെ ഗുണനിലവാരം മോശം സ്ഥിതിയിലായതിനാൽ പുറത്തിറങ്ങുന്നവർ മാസ്ക് ധരിക്കണമെന്നാണ് നിർദ്ദേശം. പുക ശമിക്കാത്തതിനാൽ യുഎസിലെ പല പരിപാടികളും റദ്ദാക്കി. വ്യാഴാഴ്ച ബെൽമോണ്ട് പാർക്കിൽ നടത്താനിരുന്ന കുതിരയോട്ട മത്സരം(ബെൽമോണ്ട് പന്തയം) വേണ്ടന്നു വച്ചു. ശനിയാഴ്ച യുഎസിൽ നടക്കുന്ന ഈ വർഷത്തെ ട്രിപ്പിൾ ക്രൗണിന്റെ അവസാന മത്സരത്തെയും ഇത് ബാധിച്ചേക്കാമെന്നാണ് സൂചന.
‘അഭൂതപൂർവമായ ഈ സാഹചര്യത്തിൽ പരിപാടി സംഘടിപ്പിക്കുമ്പോൾ സുരക്ഷ പരമപ്രധാനമാണ്. ഇവിടെ ബെൽമോണ്ട് പാർക്കിലും സരട്ടോഗ റേസ്കോഴ്സിലും പരിശീലനവും റേസിംഗും പുനരാരംഭിക്കുന്നതിനായി ഞങ്ങൾ പ്രവർത്തിക്കുന്നുണ്ട്. കൃത്യമായി തന്നെ സ്ഥിതിഗതികൾ വിലയിരുത്തും. കൂടിയാലോചനകളുടെ അടിസ്ഥാനത്തിൽ മത്സരം റേസിംഗ് നടത്തും. ശനിയാഴ്ചയോടെ വായുവിന്റെ ഗുണനിലവാരത്തിൽ പുരോഗതി ഉണ്ടാകുമെന്നാണ് കരുതുന്നത്’ എന്ന് യുഎസ് പരിശീലകൻ ടോം മോർലി പറഞ്ഞു.
‘താൻ 13 വർഷമായി ഇവിടെയുണ്ട്. ഇത്തരത്തിലുള്ള ഒരു സാഹചര്യം ഇതിന് മുമ്പ് കണ്ടിട്ടില്ല. ഇത് വളരെ വിചിത്രമാണ്. ബുധനാഴ്ച നഗരത്തിൽ ശക്തമായ പുകയായിരുന്നു. അത് ഭയാനകമായിരുന്നു. കുറയുമെന്നാണ് കരുതുന്നത്’ എന്നും ടോം മോർലി പറഞ്ഞു. അതേസമയം, വായു ഗുണനിലവാര സൂചിക 200 കവിഞ്ഞാൽ റേസിംഗിലെ ഏറ്റവും വലിയ ഇവന്റുകളിലൊന്ന് ഒഴിവാക്കപ്പെടുമെന്നാണ് ന്യൂയോർക്ക് ഗവർണറുടെ മുന്നറിയിപ്പ്.
Comments