ഇന്ത്യൻ സിനിമയിലെ രണ്ട് ഇതിഹാസങ്ങളായ രജനികാന്തും അമിതാഭ് ബച്ചനും ഒന്നിക്കുന്നു എന്ന വാർത്തകളാണ് സമൂഹമാദ്ധ്യമങ്ങളിൽ നിറയെ. ഇതോടെ ഇരുവരുടെയും ആരാധകർ ആവേശത്തിലാണ്. ജയ് ഭീമിന്റെ സംവിധായകൻ ടി.ജെ ജ്ഞാനവേലിന്റെ വരാനിരിക്കുന്ന ചിത്രമായ ‘തലൈവർ 170’-ൽ രജനിയ്ക്കൊപ്പം അമിതാഭ് ബച്ചനും വേഷമിടുന്നു എന്ന വാർത്തയാണ് പ്രചരിക്കുന്നത്. നിലവിൽ രജനി ‘ജയിലർ’, ‘ലാൽ സലാം’ എന്നീ ചിത്രങ്ങളുടെ സെറ്റിലാണ് എന്നാൽ ഇതിന് മുമ്പ് തന്നെ ‘തലൈവർ 170’ പ്രഖ്യാപിച്ചിരുന്നു. എന്നാൽ ബോളിവുഡ് താരം അമിതാഭ് ബച്ചന്റെ വാർത്തയോടെ ചിത്രം ശ്രദ്ധേയമായിക്കഴിഞ്ഞു.
1991ൽ പുറത്തിറങ്ങിയ ‘ഹം’ എന്ന ചിത്രത്തിൽ സൂപ്പർതാരങ്ങളായ രജനികാന്തും അമിതാഭ് ബച്ചനും ഒരുമിച്ച് അഭിനയിച്ചിരുന്നു. രജനികാന്ത് നായകനായെത്തിയ ‘ബാഷ’ എന്ന ചിത്രവുമായി സാമ്യമുള്ള ബോളിവുഡ് ചിത്രമായിരുന്നു ‘ഹം’. ഇരു ചിത്രങ്ങളും പ്രമേയമാക്കിയിരിക്കുന്നത് അധോലോകങ്ങളുടെ കഥയാണ്. 32 വർഷങ്ങൾക്ക് ശേഷം ഇരുവരും ഒരുമിച്ചെത്തുന്നതിന്റെ ആവേശത്തിലാണ് ജനങ്ങളും ആരാധകരും. എന്നാൽ ഇതുവരെ ഇതിന് ഔദ്യോഗിക സ്ഥിരീകരണം ഉണ്ടായിട്ടില്ല.
ലൈക പ്രൊഡക്ഷൻസ് നിർമ്മിക്കുന്ന ‘തലൈവർ 170’-ൽ എൻകൗണ്ടർ ശിക്ഷയ്ക്കെതിരെ പോരാടുന്ന വിരമിച്ച പോലീസുകാരനായാണ് രജനി വേഷമിടുന്നതെന്നാണ് അറിയാൻ സാധിക്കുന്നത്. ഈ വർഷം അവസാനത്തോടെ ചിത്രത്തിന്റെ ഷൂട്ടിംഗ് ആരംഭിക്കുമെന്നാണ് സിനിമാലോകം പ്രതീക്ഷിക്കുന്നത്. അന്ധകാനൂൻ, ഹം, ഗ്രേറ്റ്ഫാദർ എന്നീ മൂന്നു ചിത്രങ്ങളിലാണ് ഇരുവരും ഒരുമിച്ച് എത്തിയിട്ടുള്ളത്.
Comments