കൊച്ചി മെട്രോയുടെ ആറാം വാർഷികം; മെഗാ ഫെസ്റ്റിന് ഇന്ന് തുടക്കമാകും; യാത്രക്കാർക്കായി നിരവധി ഓഫറുകളും ആഘോഷ പരിപാടികളും ഒരുങ്ങി

എറണാകുളം: കൊച്ചി മെട്രോയുടെ ആറാം വാർഷികത്തോട് അനുബന്ധിച്ചുള്ള മെഗാ ഫെസ്റ്റിന് ഇന്ന് തുടക്കമാകും. യാത്രക്കാർക്ക് നിരവധി ഓഫറുകളും ആഘോഷ പരിപാടികളുമാണ് മെട്രോ സംഘടിപ്പിച്ചിരിക്കുന്നത്. ഇന്നു മുതൽ മെട്രോ സ്റ്റേഷനുകളിൽ മത്സരങ്ങളുണ്ടാവും. ഇന്ന് ഇടപ്പള്ളി സ്റ്റേഷനിൽ രാവിലെ 10 മുതൽ ബോർഡ് ഗെയിമുകൾ ആരംഭിച്ചു. നാളെ സ്റ്റേഡിയം സ്റ്റേഷനിൽ 2 മുതൽ ചെസ് മത്സരം നടത്തും.

ജൂൺ-17 ന് കൊച്ചി മെട്രോ നാടിന് സമർപ്പിച്ചിട്ട് ആറുവർഷം തികയുകയാണ്. മെട്രോയുടെ പിറന്നാൾ ദിനമായ അന്നേ ദിവസം യാത്രക്കാർക്ക് ടിക്കറ്റ് നിരക്കിൽ ഇളവ് ലഭിക്കും. 20 രൂപയ്‌ക്ക് യാത്രചെയ്യാം. മിനിമം നിരക്കായ 10 രൂപ അതേപടി തുടരും. 30, 40, 50, 60 രൂപയുടെ ടിക്കറ്റിന് പകരം 20 രൂപ മാത്രം നൽകിയാൽ മതി. റസിഡന്റ്‌സ് അസോസിയേഷനുകളുടെ സംഘടനയായ എഡ്രാക്ക് 17-ന് കലൂർ മെട്രോ സ്റ്റേഷനിൽ ഉൽപ്പന്ന പ്രദർശന- വിൽപ്പന മേള ഒരുക്കും. മെട്രോയും താരസംഘടനയായ അമ്മയും ചേർന്നൊരുക്കുന്ന മെട്രോ ഷോർട്ട് ഫിലിം മത്സരത്തിൽ 60 എൻട്രികൾ ഇതിനകം തന്നെ ലഭിച്ചു.

ജൂൺ 17-ന് ഉച്ചകഴിഞ്ഞ് 2 മണിയ്‌ക്ക് ‘ബോബനും മോളിയും ‘എന്ന പേരിൽ മെട്രോ നടത്തുന്ന ക്വിസ് മത്സരം വൈറ്റില മെട്രോ സ്റ്റേഷനിൽ വെച്ച് നടക്കും. വിശദവിവരങ്ങൾക്ക് 79076 35399 എന്ന നമ്പറിൽ ബന്ധപ്പെടുക. അന്നേദിവസം ചിത്രരചനാ മത്സരവും 15 വയസ്സിൽ താഴെയുള്ള വിദ്യാർത്ഥികൾക്ക് ചെസ് മത്സരവും നടത്തും.

ജൂൺ-15 ന് മെട്രോ ട്രെയിനുകളിൽ പ്രശസ്ത കാർട്ടൂണിസ്റ്റുകൾ യാത്രക്കാരുടെ കാരിക്കേച്ചറുകൾ വരച്ചു സമ്മാനിക്കും. ജൂൺ 16-ന് എസ്സിഎസ്എംഎസ് കോളജിന്റെ സഹകരണത്തോടെ പൊതുഗതാഗത കോൺക്ലേവ് നടത്തും. ജൂൺ-11 മുതൽ 17 വരെ ആലുവ, കളമശേരി, പാലാരിവട്ടം, കലൂർ, എംജി റോഡ്, കടവന്ത്ര, വൈറ്റില, വടക്കേക്കോട്ട സ്റ്റേഷനുകളിൽ കുടുംബശ്രീ പ്രദർശന-വിൽപ്പന മേള സംഘടിപ്പിക്കും. ജൂൺ-22 മുതൽ 25 വരെ വൈറ്റില സ്റ്റേഷനിൽ ഫ്‌ളവർ ആൻഡ് മാംഗോ ഫെസ്റ്റും മെട്രോ ഒരുക്കും.