മലയാള സിനിമാപ്രേക്ഷകർ കാത്തിരിക്കുന്ന ചിത്രമാണ് എമ്പുരാൻ. സിനിമയുടെ ഓരോ അപ്ഡേഷനും സമൂഹമാദ്ധ്യമങ്ങളിൽ ചർച്ചയായിമാറാറുണ്ട്. ചിത്രത്തിന്റെ ലൊക്കേഷന് തെരഞ്ഞുള്ള യാത്രകളിലായിരുന്നു കഴിഞ്ഞ കുറച്ച് നാളുകളായി പൃഥ്വിരാജും മറ്റ് അണിയറപ്രവര്ത്തകരും. ഈ വര്ഷം പകുതിയോടെ ചിത്രീകരണം തുടങ്ങണമെന്നാണ് തന്റെ ആഗ്രഹമെന്ന് പൃഥ്വിരാജ് നേരത്തേ അറിയിച്ചിരുന്നു. എന്നാല് ആരംഭത്തിന് അല്പം കൂടി വൈകുമെന്നാണ് ഇപ്പോൾ പുറത്ത വരുന്ന റിപ്പോർട്ടുകൾ.
ലൂസിഫറിന്റെ ചിത്രീകരണം സെപ്റ്റംബര് ആദ്യ വാരം ആരംഭിക്കുമെന്നാണ് പുറത്തെത്തുന്ന വിവരം. പ്രമുഖ ട്രേഡ് അനലിസ്റ്റ് ശ്രീധര് പിള്ള അടക്കമുള്ളവര് ഇക്കാര്യം ട്വിറ്ററിലൂടെയാണ് അറിയിച്ചിരിക്കുന്നത്. ഇന്ത്യയിലും വിദേശത്തുമായി നിരവധി ലൊക്കേഷനുകളുള്ള സിനിമയുടെ ചിത്രീകരണം ആരംഭിക്കുക നോയിഡയിലും ലഡാക്കിലുമായി ആയിരിക്കുമെന്നും ശ്രീധര് പിള്ള കുറിച്ചു.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരും പൃഥ്വിരാജ് പ്രൊഡക്ഷൻസുംചേർന്നാണ് നിർമ്മാണം. കെ.ജി.എഫ് നിർമ്മാതാക്കളായ ഹോംബാലെ ഫിലിംസ് സഹനിർമ്മാതാക്കളാണ്. എമ്പുരാൻ ലൂസിഫറിന്റെ രണ്ടാം ഭാഗമല്ല, മൂന്നു ഭാഗങ്ങളുള്ള സീരിസുകളിലെ രണ്ടാം ചിത്രമെന്ന് തിരക്കഥാകൃത്ത് മുരളിഗോപി മുൻപ് പറഞ്ഞിരുന്നു. അബ്രഹാം ഖുറേഷി മറ്റൊരു ദൗത്യവുമായി എത്തുന്നതിനു കാത്തിരിക്കുകയാണ് പ്രേക്ഷകർ.
