തിരുവനന്തപുരം: പ്ലസ് വൺ ഏകജാലക പ്രവേശനത്തിനുള്ള ട്രയൽ അലോട്ട്‌മെന്റ് ഫലം ഇന്ന് പ്രസിദ്ധീകരിക്കും. ഇന്ന് വൈകിട്ട് നാല് മുതൽ വിദ്യാർത്ഥികൾക്ക് https://school.hscap.kerala.gov.in/index.php/candidate_login/ എന്ന വെബിസൈറ്റിലൂടെ പരിശോധിക്കാം. പ്രോസ്പക്ടസ് മാനദണ്ഡങ്ങൾക്കനുസൃതമായി സാധുതയുള്ള അപേക്ഷകളും ഓപ്ഷനുകളുമാണ് പരിഗണിച്ചിട്ടുള്ളത്. ജൂൺ 15-ന് വൈകിട്ട് അഞ്ച് മണിവരെ അപേക്ഷകർക്ക് ട്രയൽ അലോട്ട്‌മെന്റ് ലിസ്റ്റ് പരിശോധിക്കാവുന്നതാണ്. ആദ്യ അലോട്ട്‌മെന്റിന് മുൻപായി അപേക്ഷയിൽ എന്തെങ്കിലും മാറ്റം വരുത്തുന്നതിനുള്ള അവസാന അവസരം കൂടിയാണിത്.
കാൻഡിഡേറ്റ് ലോഗിൻ വഴി യൂസർ നെയിമും പാസ് വേർഡും ഉപയോഗിച്ച് വിദ്യാർത്ഥികൾക്ക് ട്രയൽ അലോട്ട്‌മെന്റ് പരിശോധിക്കാവുന്നതാണ്. അലോട്ട്‌മെന്റ് പരിശോധിക്കുന്നതിനും തിരുത്തുന്നതിനുമായി സംസ്ഥാനത്തെ എല്ലാ സർക്കാർ, എയ്ഡഡ് ഹൈസ്‌കൂൾ, ഹയർ സെക്കൻഡറി സ്‌കൂളുകളിലെയും ഹെൽപ്പ് ഡെസ്‌കുകളും സഹായകമാകും.
ജൂൺ 19-നാണ് ആദ്യ അലോട്ട്‌മെന്റ്. സംസ്ഥാനത്ത് 4,59,330 വിദ്യാർത്ഥികളാണ് അപേക്ഷിച്ചിട്ടുള്ളത്. ആദ്യ അലോട്ട്‌മെന്റിൽ 3,75,000 പേർക്ക് പ്രവേശനം ലഭ്യമാകും. ജൂലൈ അഞ്ചിനാവും ക്ലാസുകൾ ആരംഭിക്കുക.
