‘അയ്യപ്പസ്വാമിയല്ലേ…….’; സന്നിധാനന്ദന്റെ സ്വരത്തിൽ വീണ്ടുമൊരു അയ്യപ്പസ്തുതി; ഷറഫുദ്ധീൻ ചിത്രം ‘മധുര മനോഹര മോഹ’ത്തിലെ പുതിയ ഗാനം പുറത്തിറങ്ങി

മലയാളത്തിലെ പ്രശസ്ത കോസ്റ്റ്യൂം ഡിസൈനർ സ്റ്റെഫി സേവ്യർ സംവിധാനം ചെയ്യുന്ന ഏറ്റവും പുതിയ ചിത്രം മധുര മനോഹര മോഹത്തിലെ ‘അയ്യപ്പസ്വാമിയല്ലേ’ എന്നു തുടങ്ങുന്ന പുതിയ ഗാനം പുറത്തിറങ്ങി. റിയാലിറ്റി ഷോയിലൂടെ കടന്നു വന്ന ഗായകൻ സന്നിധാനന്ദനാണ് ഈ ഗാനം ആലപിച്ചിരിക്കുന്നത്.

ഗാനരചയീതാവ് ഹരിനാരായണന്റെ വരികൾക്ക് ഹിഷാം അബ്ദുൾ വഹാബാണ് സംഗീതം നൽകിയിരിക്കുന്നത്. ഹൃദയം, മൈക്ക് എന്നീ മലയാളചിത്രങ്ങൾക്ക് ശേഷം ഹിഷാം അബ്ദുൾ വഹാബ് സംഗീത സംവിധാനം നിർവഹിക്കുന്ന ചിത്രം കൂടിയാണിത്. ഗാനം ഇതിനോടകം തന്നെ വൈറലായിക്കഴിഞ്ഞു.

ഒരു മുഴുനീള ഫാമിലി – കോമഡി എന്റർടെയിനറാണ് മധുര മനോഹര മോഹം. ചിത്രത്തിൽ രജിഷ വിജയൻ, സൈജു കുറുപ്പ്, ഷറഫുദ്ധീൻ എന്നിവരാണ് പ്രധാന വേഷത്തിൽ എത്തുന്നത്. വിജയരാഘവൻ, ബിന്ദു പണിക്കർ, അൽത്താഫ് സലിം, ബിജു സോപാനം, ആർഷ ബൈജു, സുനിൽ സുഖദ എന്നിവരാണ് മറ്റു പ്രധാന കഥാപാത്രങ്ങളെ ചിത്രത്തിൽ അവതരിപ്പിക്കുന്നത്.

ബുള്ളറ്റ് ഡയറീസ് എന്ന് ചിത്രത്തിന് ശേഷം B3M ക്രിയേഷൻസ് നിർമ്മിക്കുന്ന ചിത്രത്തിന്റെ കഥ, തിരക്കഥ, സംഭാഷണം നിർവഹിച്ചിരിക്കുന്നത് മഹേഷ് ഗോപാൽ, ജയ് വിഷ്ണു എന്നിവർ ചേർന്നാണ്. ചിരിയുടെ ആഘോഷവിരുന്നുമായി ‘മധുര മനോഹര മോഹം’ ജൂൺ 16 മുതൽ തിയേറ്ററുകളിലെത്തുന്നു.