എമേർജിംഗ് ഏഷ്യാ കപ്പ്: ഹോങ്കോങിനെ ചുരുട്ടിക്കൂട്ടി ഇന്ത്യൻ പെൺപട: വിജയലക്ഷ്യം മറികടന്നത് അഞ്ചോവറിൽ

അത്യുഗ്രൻ വിജയത്തോടെ വനിതാ എമേർജിംഗ് ഏഷ്യാ കപ്പിന് തുടക്കമിട്ട് ടീം ഇന്ത്യ. ഗ്രൂപ്പ് ഘട്ടത്തിലെ ആദ്യ മത്സരത്തിൽ ഹോങ്കോങിനെ നേരിട്ട ഇന്ത്യ 9 വിക്കറ്റ് വിജയമാണ് നേടിയത്. ആദ്യം ബാറ്റു ചെയ്ത ഹോങ്കോങിനെ 34 റൺസിന് എറിഞ്ഞിട്ട പെൺപട 5.2 ഓവറിലേക്ക് ലക്ഷ്യം മറികടന്നു. ഇന്ത്യയ്‌ക്ക് ക്യാപ്ടൻ ശ്വേതയുടെ വിക്കറ്റ് മാത്രാമണ് നഷ്ടമായത്. തൃഷ 19 റൺസുമായി ചേത്രി 16 റൺസുമായും പുറത്താകാതെ നിന്നു

അഞ്ച് വിക്കറ്റ് എടുത്ത ശ്രെയെങ്ക പട്ടീൽ ആണ് കളിയിലെ താരമായത്. 3 ഓവർ എറിഞ്ഞ ശ്രെയെങ്ക 2 റൺസ് മാത്രം വിട്ട് കൊടുത്താണ് അഞ്ചു വിക്കറ്റ് എടുത്തത്.
മന്നത്ത് കശ്യപ്, പർശവി എന്നിവർ രണ്ട് വിക്കറ്റ് വീതം വീഴ്‌ത്തി. ടിറ്റാസ് സദു ഒരു വിക്കറ്റും വീഴ്‌ത്തി. ആകെ 14 ഓവർ മാത്രമെ ഹോങ്കോങ് ഇന്നിങ്‌സ് നീണ്ടു നിന്നുള്ളൂ. 14 റൺസ് എടുത്ത മരികോ ഹിൽ ഹോങ്കോങിന്റെ ടോപ് സ്‌കോറർ ആയി. ഹിൽ മാത്രമാണ് അവരുടെ ബാറ്റിംഗ് നിരയിൽ രണ്ടക്കം കടന്നത്.