ന്യൂഡൽഹി : പാർട്ടി യോഗത്തിൽ പങ്കെടുക്കാൻ 15 ന് തെലങ്കാനയിൽ എത്തുന്ന കേന്ദ്ര ആഭ്യന്തരമന്ത്രി അമിത് ഷാ സംവിധായകൻ എസ് എസ് രാജമൗലിയുമായി കൂടിക്കാഴ്‌ച്ച നടത്തുമെന്ന് റിപ്പോർട്ട് . ഇരുവരും തമ്മിലുള്ള കൂടിക്കാഴ്ച രാഷ്ട്രീയമായി ഏറെ നിർണ്ണായകമാകുമെന്നാണ് തെലുങ്ക് മാദ്ധ്യമങ്ങൾ റിപ്പോർട്ട് ചെയ്യുന്നത് . അതേസമയം നടൻ പ്രഭാസും അമിത് ഷായെ കാണും .
സമ്പർക്ക് ഫോർ സമർഥൻ എന്ന പേരിൽ അമിത് ഷാ സംസ്ഥാനത്തെ ചില പ്രമുഖരോട് ബിജെപിയെ പിന്തുണയ്‌ക്കാൻ ആവശ്യപ്പെടുന്നുണ്ട് . അതിന്റെ ഭാഗമായാണ് രാജമൗലിയുമായി കൂടിക്കാഴ്‌ച്ചയെന്നാണ് സൂചന. വ്യാഴാഴ്ച നോവാടെൽ ഹോട്ടലിൽ വച്ചാണ് ഇരുവരും കൂടിക്കാഴ്ച നടത്തുന്നത്.
നേരത്തെ, ഓസ്‌കാർ വിജയത്തോടനുബന്ധിച്ച് അമിത് ഷാ ഹൈദരാബാദ് സന്ദർശിച്ചപ്പോൾ അത്താഴം വിരുന്ന് നിശ്ചയിച്ചിരുന്നു. എന്നാൽ തിരക്കേറിയ ഷെഡ്യൂൾ കാരണം ഇത് പിന്നീട് റദ്ദാക്കി. ഈ മാസം 15ന് ഭദ്രാചലത്തിൽ രാമദർശനത്തോടെയാണ് അമിത് ഷാ തെലങ്കാന പര്യടനം ആരംഭിക്കുന്നത്. ജൂനിയർ എൻടിആർ നേരത്തെ അമിത് ഷായെ കണ്ടിരുന്നു. കൂടാതെ രാംചരൺ അമിത് ഷായുമായി ഡൽഹിയിൽ കൂടിക്കാഴ്ച നടത്തിയിരുന്നു.
